Ove hẽ wa Lisoka Luti wo Lagani Auna?

ETEKE limue, vamanji vamue vavali vimbo lio Port Moresby kofeka yo Papua Nova Guiné, va kala oku tunda kupange woku kunda. Osimbu va kala oku enda, va mola uti umue wa posoka. Ukulu waco wa popia hati: ‘Tala, uti wo lagani auna!’ Noke wa sapuila umalẽhe hati: ‘Onduko eyi yi lomboloka ‘uti wunyamo.’ Uti owu, wa litepa loviti vialua via mulo vofeka. Momo anyamo osi wa siata oku loluka amẽla kuenje u kala ndu okuti wa kukuta. Pole, eci ombela yi fetika oku loka, u yova. Noke u kuata olonelẽho, kuenje u posoka vali.’

Uti wo lagani auna, ale wolonelẽho ndomo wa kũlĩhĩwa, u tu longisa ovina vialua. Olonoño via siata oku popia okuti, uti waco u sangiwa pokati koviti vitãlo violonelẽho via fina calua vi kasi voluali. Kotembo yokuenye, u loluka olonelẽho lamẽla, pole ka u kukuta lutanya. Momo u kuete ovava alua. Olombombo viawo via pama calua okuti viñila kosi toke kocikalakala. Kuenje ndaño ku iya ofela yalua, ka u teka.

Ocili okuti, etu tua siata oku liyaka lovitangi vialua vi seteka ekolelo lietu. Oco hẽ, nye ci tu kuatisa oku pandikisa? Tu sukila oku kala nduti wa tukuiwa ndeti, poku litekula lovava omuenyo a sangiwa Vondaka ya Suku. Tu sukilavo oku kakatela ku Yehova ‘ewe lietu’ kuenda kocisoko caye. (2 Samuele 22:⁠3) Uti wo lagani auna, owo ocindekaise cavelapo coku pandikisa. Owo u tu longisa okuti, eci tu liyaka lovitangi, tu sukila oku pamisa ekolelo lietu poku kuatisiwa lokulia kuespiritu Yehova a siata oku angiliya. Nda tua ci linga, tuka “piñala olohuminyo” lelavoko liomuenyo ko pui.​—⁠Va Heveru 6:12; Esituluilo 21:⁠4.