‘Nda Tava Kolondaka Viwa Omo Liokamõla ka Kuete Anyamo Ecea’
UKÃI umue o tukuiwa hati Wiesława, kofeka yo Polonia, eci Olombangi via Yehova via veta kepito liaye, wa vi tambulula lesumbilo. Pole ka tavele oku yevelela kesapulo liavo. Eteke limue okamõla kamue ka kuete anyamo ecea o tukuiwa hati, Samuele wa endele kupange woku kunda la inaye. Kuenje va veta kepito liukãi waco. Noke ukãi waco wa nõlapo oku yevelela. Kuenje wa tava oku tambula Utala Wondavululi u lombolola eci catiamẽla koluali luokaliye.
Omo okuti eteke Lionjivaluko yolofa via Yesu lia kala ocipepi, Samuele wa yonguile oku laleka ukãi waco oco a ende Kocipito caco. Omo liaco, eteke likuavo Samuele wa endele vali konjo yaco la inaye lokokanda kelaleko. Ukãi eci a mola Samuele okuti wa wala ciwa, wa pinga kokuavo oco a tiukile vonjo. Eci a tiuka, wa wala uwalo ukuavo wa sunguluka. Kuenje, wa yevelela kondaka ya Samuele kuenda wa tambula ukanda welaleko. Noke wa pula hati: ‘Citava hẽ okuti ndiya likaliange ale ndiya lulume wange?’ Noke wamisako hati: ‘Nda ulume wange ka tavele, ndiya likaliange. Pole, ndi ci lingila ño omo liove a Samuele.’ Poku sanjuisa Samuele, ukãi waco wa tẽlisa muẽle ondaka yaye.
Samuele wa tumãlele laye vokuenda kuohundo Yonjivaluko. Kuenje wo lekisa ovinimbu Viembimbiliya hundi a kala oku tukula. Ukãi waco wa komõha calua. Eye wa sola calua Ocipito Conjivaluko kuenda wa komõhavo ndomo olonumbi viaco via lombololuiwa ciwa. Handi vali, wa sanjukilavo ndomo vamanji vo yolela kuenda ocisola va lekisa kokuaye. Cilo Wiesława wa siata oku sola calua ovina viespiritu. Kuenje, wa fetika oku endaenda kolohongele. Koloneke via pita wa sapuila ina ya Samuele hati: ‘Eci ndivaluka ndomo nda likalele oku yeva kesapulo liene, ndi kuata osõi. Pole, ndu ku sapuila okuti, nda yeva lika kesapulo liene omo liomõla wove Samuele o kuete anyamo ecea.’
Amalẽhe valua Olombangi via Yehova kofeka yo Polonia, va siatavo oku kuama ongangu ya Samuele yoku kunda olondaka viwa, kuenda oku sivaya Yehova lovilinga viavo. Nda ove umalẽhe, o pondolavo oku kuatisa omanu va kuavitima via sunguluka oco va sole Ondaka ya Suku.