Omanu va Siata Oku Sandiliya Omuenyo ko Pui
TUNDE kosimbu, omanu va siata oku sandiliya onjila yoku kala otembo ka yi pui. Pole, toke cilo, onjongole yaco ka yi kasi oku tẽlisiwa. Momo lomue o tẽla oku malako olofa. Kanyamo alo a sulako, uloño woku sakula ovovei, wa siata oku eca elavoko liokuti, ci tẽliwa oku amisa omuenyo womunu kovaso. Tu konomuisi ndomo olonoño via siata oku lilongisa olonjila via litepa viatiamẽla kondaka eyi.
Vakuoloño woku konomuisa etimba liomunu, va kasi oku sanda onjila yoku kũlĩha apa pa sulila etendelo lioku licita kuoloselula vetimba. Ovo va kũlĩha okuti, eci oloselula vimue vi kuka, vi piñanyiwa levi viokaliye. Osimbu omunu a kasi lomuenyo, etimba liaye li litumbulola olio muẽle. Ovo va popia hati, nda ‘uloño waco woku litumbulula wamisiwa kovaso, omunu citava okuti o kala otembo yalua, ale otembo ka yi pui.’
Uloño ukuavo woku piñainya ovimatamata viomunu, wa siata oku ecelela olombei oku kuata ovimatamata viokaliye ndeci: Omuma, olongẽla, kuenda utima. Oloselula viombei yaco, ovio vi kuatisa oku piñainya ovimatamata vetimba liaye.
Olonoño vimue via lombolola okuti, kovaso yoloneke olondotolo vika kuata uloño woku kapa volosinga viosonde yomunu okamakina kamue koku nyola uvei wo câncer. Vamue va popia hati, uloño waco uka ecelela okuti, etimba liomunu lika amamako luhayele wasuapo otembo ka yi pui.
Vakuoloño woku konomuisa ovovei, va siata oku kapa omanu va fa volomakina vioku talalisa ovina. Ovo va popia hati, atimba aco a selekiwa toke eci olondotolo vi kuata uloño woku sakula ovovei, loku malako oku kuka, oku tumbulula omuenyo, kuenda uhayele womunu waco wa fa. Ukanda umue wasapulo wa lombololola okuti, ocisimĩlo eci ca lisoka leci ‘va Egito va lingaile kosimbu coku kapa ovihemba ketimba liomunu wa fa oco ka lika vole.’
Uloño womanu woku sanda oku kala otembo yosi komuenyo, u lekisa okuti kokuavo ka ca lelukile oku tava okuti omunu o fa. Anga hẽ ci tava okuti omanu va kuata omuenyo ko pui? Nye Embimbiliya li popia catiamẽla kondaka eyi? Ocipama cikuãimo cika eca etambululo kapulilo ava.