Anga hẽ Lomue o Tẽla Oku Mãlako Evĩho?
Kamõla umue ukuenje wa sanga omina, kuenje wa yi nõla. Eci ya tuika, yo nyõla ovaso, kuenje wa linga omeke. Ukãi umue eci a cita, wa inasi oñaña yaye keyala lia kala kohulo yetapalo. Ulume umue wa tundisiwa kupange waye, eci a tiukilako, wa ponda omanu vosi va molẽha kovaso yaye. Noke wa lipondavo eye muẽle. Ulume umue wa sumbiwa calua, wa lipekela lomãla valua vatito.
OVOLANDU ava evĩho, a siata calua koloneke vilo. Pole, omo liasapulo alua atiamẽla kolofa vi tunda kolonepele, kuenda kungangala, omanu ka va siatele oku kapako ovolandu aco. Elivulu limue lia sandekiwa kunyamo wo 1995 lia lombolola hati: ‘Ocita cakũi avali, ca linga ocita ca Satana. Momo tunde kosimbu ka kua la kala ocitumbulukila cimue ci kuete ombili yoku ponda vakuavo omo liolonepele viapata, lolonepele viatavo, ndeci ci kasi oku pita koloneke vilo.’
Handi vali, omanu va kasi oku vĩhisa ofela, loku nyõla ongongo lovokuasi a sangiwamo, kuenda oku kundula ombuto yosi yovinyama. Anga hẽ, eteke limue omanu vaka tẽla oku mãlako ovitangi via tukuiwa ndeti, loku kala voluali lumue okuti ka va kuata vali usumba? Oku seteka oku malako ovitangi violuali, ci kasi ndoku kotola olusipa luovava lolueyo. Ulongisi umue, poku lombolola eci catiamẽla kevĩho lia siata voluali wa popia hati: ‘Ndi kuete onjongole yoku pongolola oluali okuti omanu va kuata ombembua. Pole, ka ci tẽliwa.’ Ove citava okuti, pamue wa kuatelevo ovisimĩlo viaco.
Ekalo lioluali lulo, li sokisiwa locimbaluku ci kasi vokalunga okuti akimba aco a livokiya eteke leteke. Ndaño okuti, lomue o yongola oku kuama oku ocimbaluku ci kasi oku enda, a likolisilo a lingiwa oku ci popela, ka a kuatele esilivilo. Momo ocimbaluku caco, ca enda vokati kokalunga muli akimba anene.
Vimue pokati kovitangi tua siata oku liyaka lavio cilo, vi tunda kovilinga viomanu omo liekambo lioku lipua. (Va Roma 3:23) Pole, voluali mu kasi oku pita ovina vialua vĩvi okuti omanu ka va kasi oku vi linga longusu yavo muẽle. Anga hẽ, kuli ongusu yimue yi kasi oku va vetiya oku linga ovina viaco vĩvi? Nda kuli, ongusu yaco yi tunda pi, kuenda tu liteyuila ndati kongusu yaco? Ocipama cikuãimo cika tambulula apulilo ava.
[Olondaka vielitalatu kemẽla 3]
© Heldur Netocny/Panos Pictures