Ocitangi Coku Lekisa Umbombe

KOLONEKE vilo, omanu va siata oku sima okuti, ka va sukila oku lekisa umbombe. Omanu vana va kemãla, va siata oku livelisapo omo liepela, kuenje va sanda onjila yoku kuata ovina va yongola. Omanu valua voluali, va kuetele onya olohuasi, pole ka va kuetele onya ambombe. Onepa yalua yolohuasi, va siata oku lipanda omo liovina va kuete. Ovo ka va lekisa umbombe, pole va livelisapo loku lekisa epela omo liovina va siata oku linga.

Ulume umue onoño wo kofeka yo Kanada, wa popia eci catiamẽla “kocituwa coku livelisapo” ca siata vofeka yavo. Omanu vamue va siata oku sima okuti, oku tẽlisa olonjongole viavo, oco ca velapo, pole ka va kapiko ovina vikuavo. Ocili okuti, omanu valua koloneke vilo, va sakalala lika loku tẽlisa olonjongole viavo. Omo liaco, va sima okuti, ka va sukila vali oku lekisa umbombe.

Omanu vamue ka va tava kocisimĩlo cokuti umbombe ocituwa cimue ciwa ku vakuavo. Momo vana okuti ambombe, ca leluka oku lekisa ocituwa caco. Pole, vamue va siata oku sima okuti, nda va lekisa umbombe, va tendiwa la vakuavo okuti va topa.

Ondaka ya Suku yi sangiwa Vembimbiliya, ya popele okuti, koloneke via sulako omanu vaka linga “vakuakulipandiya, [haivo] vakueyengu.” (2 Timoteo 3:​1, 2) Ove hẽ, ku tava okuti, ocitumasuku eci ci kasi oku tẽlisiwa? O tẽla hẽ oku limbuka esilivilo lioku lekisa umbombe? Ale o sima okuti omunu embombe o tendiwa nda umue wa topa okuti ka sumbiwa la vakuavo?

Embimbiliya li lombolola esunga lieci omanu va sukilila oku lekisa umbombe. Olio, li lombololavo esilivilo liumbombe kuenda li vetiya omanu oku lekisa ocituwa caco. Handi vali, li lekisavo okuti, umbombe ocituwa cimue ci pamisa omanu, pole ka ci lomboloka ehonguo, ale oku topa.

[Elitalatu kemẽla 3]

Nye tu sima catiamẽla kovina tua siata oku linga?