Wa Siata hẽ Oku Sanda Apuluvi Oku Vangula Catiamẽla Ketavo Liove?
OLONDONGE vimue kofeka yo Polonia, via tumiwile oku lombolola osapi ya linga hati: “Anga hẽ voluali muli ocili?” Olonumbi va tambula vioku lombolola ulandu waco via popia hati: “Ka tu sukila ocili. Lomue pokati ketu o ci sukila. Voluali lomue o vangula ocili.” Ufeko umue Ombangi ya Yehova, o tukuiwa hati Agata, o kuete ci soka 15 kanyamo o lilongisila kosikola yimue ya velapo. Eye, wa nõla epuluvi liaco oco a sapuile vakuavo catiamẽla ketavo liaye.
Agata, osimbu handi ka fetikile oku soneha, wa likutilila ku Yehova oco o kuatise. Noke, wa sandiliya atosi a yonguile oku kongela vocipama caco. Eye wa sanga atosi amue Vutala Wondavululi 1 wosãi Yevambi Linene wunyamo wo 1995. Kuenje, wa tukula epulilo lina Pondiu Pilato a linga ku Yesu hati: “Ocili, oco nye?” (Yoano 18:38) Epulilo liaco a soneha, lilomboloka olondaka viesino vioku popia hati: ‘Ocili ci lomboloka nye? Voluali ka muli ocili!’ Noke, Agata wa soneha hati: “Epulilo lia Pilato lia ndi kuatisa oku ivaluka olonumbi nda tambula vioku soneha ulandu waco.”
Kuenje, wa lombolola hati, ocisimĩlo cina vamue va tava okuti cocili, pamue va kuavo ka va ci tava. Pole, citava okuti, ovisimĩlo viaco viosi “viocili.” Eye wa pula hati: “Helie pokati ketu o kuata utõi woku londa vombalãu, osimbu handi ka sokoluile nda yi kuete olonumbi viocili vioku yendisa ale ka yi kuete?” Noke wa lekisa elavoko Liembimbiliya poku popia hati: “Oku kolela Kondaka ya Suku ci kuete esilivilo.” Eye wa lekisa elavoko liaye liokuti, vana va sandiliya ocili, va likolisilako toke va ci sanga.
Manji Agata, wa tambula ukanda wuvangi, kuenje wa kuata epuluvi lioku tangela ulandu waye kovaso yolondonge viosi. Valua akamba vaye vo kosikola, va tava oku lilongisa laye Embimbiliya. Noke, Agata wa kuata esanju lialua omo lioku sapuilako vakuavo catiamẽla ketavo liaye. Nda wa sanda epuluvi lioku sapuila vakuene catiamẽla kekolelo liove, ci kuatisa valua oku kũlĩha ocili. Epuluvi lipi wa siata oku kuata oco o sapuile vakuene catiamẽla ketavo liove?