Usoma wa Suku u Lomboloka Nye?

NYE Yesu a enda oku sapuila omanu kupange woku kunda? Usoma wa Suku owo wa kala osapi yupange waye woku kunda. (Luka 4:​43) Usoma waco, wa u tukula calua poku sapela lomanu. Anga hẽ ca tĩlile oku kuata elomboloko liondaka yaco? Sio. Vevanjeliu ka tu sangimo apulilo aco. Omanu va kũlĩha hẽ eci Usoma wa Suku u lomboloka?

Ovisonehua via va Yudea kosimbu, via tendele Usoma ndocina cimue ci kola kuenda via lombolola ovina owo uka tẽlisa. Kaliye, tu konomuisi atosi epanduvali a sangiwa Vembimbiliya atiamẽla Kusoma. Atosi atatu atete, a kũlĩhĩwile la va Yudea kotembo yale, kuenda koloneke via Yesu. Atosi akuavo, a longisiwa la Yesu kuenda ovapostolo vaye kocita catete. Etosi lia sulako lia tukuiwila oloneke vilo.

1. Usoma wa Suku uviali umue wocili kuenda uka kala otembo ka yi pui. Ocitumasuku catete ci li Vembimbiliya, ca lekisa okuti Suku wa laikele oku tuma onjovoli yomanu vakuekolelo. “Ombuto” yaco, ya laikele oku tetulula ovitangi via kokiwa la Adama la Heva kuenda Satana. (Efetikilo 3:​15) Noke yotembo yimue, Soma Daviti wa popele eci catiamẽla “kombuto,” okuti Mesiya. Eye wa laikele oku kala Ombiali Yusoma waco. Uviali waco wa litepa calua lovoviali akuavo. Owo, wa laikele oku kala otembo ka yi pui.​—⁠2 Samuele 7:​12-14.

2. Usoma wa Suku uka nyõla ovoviali osi oluali. Uprofeto Daniele wa muile ocinjonde ca lekisa olosoma violuali via kala oku viala kotembo yaye toke koloneke vilo. Onepa yasulako yocinjonde caye yi popia hati: “Koloneke [via sulako] violosoma viaco [violuali], Suku yokilu o katula usoma, kuenje ka u nyõleha, ka u tambuiwa lomanu vofeka yiñi; puãi owo u nyõla loku lia ovosoma aco, haiwo u kala muẽle hũ oloneke ka vi pui.” Omo liaco, olombiali viosi vio voluali lulo vika nyõliwa. Kuenje ka ku kala vali ovoyaki, ungangala, ndaño ovituwa viavo vĩvi. Ndomo ca lekisiwa vocitumasuku ca Daniele, Usoma wa Suku uka viala oluali luosi. (Daniele 2:​44, 45) Usoma waco owo lika uka viala ilu lieve.a

3. Usoma wa Suku uka mãlako ovovei, onjala kuenda olofa. Ovitumasuku vi lekisa okuti eci Usoma wa Suku uka linga palo posi. Uviali waco uka tẽlisa ovina viosi tu sukila, okuti layimue ombiali yi tẽla oku ci linga. Sokolola ndomo oluali luka kala eci ovota osi aka nyõliwa! “Imola ovita toke kesukiyo liongongo.” (Osamo 46:⁠9) Ka kuka kala vali olondotolo, olosipitali, ndaño ovovei. “Layimue onungi yi popia yiti, Ndi vela.” (Isaya 33:​24) Ka kuka kala ekambo liokulia, ndaño elambu. “Vofeka mu [ka kala] olomema via lua.” (Osamo 72:​16) Ka kuka kala olonambi, ayambo, ndaño upongo u kokiwa lolofa. Ku fa oka nyõliwa pe. Suku oka “takisa olumue okufa, kuenje Ñala Yehova o puenya asuẽlẽla kovipala viosi.”​—⁠Isaya 25:⁠8.

4. Usoma wa Suku u kuete ombiali ya nõliwa la Suku. Mesiya hayeko wa li nõla eye muẽle kuenda ka nõliwile lomanu ka va lipuile. Eye wa nõliwa la Yehova Suku. Olonduko viaye ndeci, Mesiya kuenda Kristu, vi lomboloka “Ombuavekua.” Yehova poku nõla Osoma yaco, wa popia layo hati: “Tala ukuenje wange u ndu vetatela, onoliwe yange, utima wange wo sanjukila. Ndo wĩha Espiritu liange, eye o longisa olofeka esunga.” (Isaya 42:1; Mateo 12:​17, 18) Kuli hẽ omunu ukuavo wa kũlĩha ciwa Osoma tu sukila, okuti Ululiki wetu ci sule?

5. Osoma Yusoma wa Suku ya lekisa unene waye komanu vosi. Yesu u Nasara wa lekisa okuti eye wa kala muẽle Mesiya. Eye wa citiwile vepata lia nõliwile la Suku. (Efetikilo 22:18; 1 Asapulo 17:11; Mateo 1:⁠1) Eci a kala palo posi, wa tẽlisa ovitumasuku viosi viatiamẽlele ku Mesiya. Ca tẽlisiwa hẽ ndati? Suku wa vanguila kilu, kuenda wa lekisa okuti eye Omõlaye. Ovangelo va lekisa okuti Yesu eye Mesiya wa likuminyiwile. Kuenda eye wa linga ovikomo vialua kovaso omanu, kuenje wa lekisa okuti wa kala lunene wa Suku.b Yesu wa lekisa olonjanja vialua ndomo eye a ka viala. Eye ka kuatele lika unene woku kuatisa omanu, pole wa kala lonjongole yoku ci linga. (Mateo 8:​1-3) Wa kalavo ukuacili, ukuahenda, ukuotõi kuenda embombe. Embimbiliya li tu lomboluila ulandu wa Yesu eci a kala palo posi.

6. Usoma wa Suku u kuete 144.000 komanu vaka viala kumue la Kristu. Yesu wa popia okuti omanu vakuavo ndeci ovapostolo vaye, va laikele oku viala kumue laye. Ocimunga caco wa ci tukula hati ‘okacunda katito.’ (Luka 12:​32) Noke yotembo yimue, upostolo Yoano wa lekisa okuti ci soka 144.000 komanu, ovo lika va tiamẽla kokacunda kaco. Ovo vaka viala kilu kumue la Kristu, ndolosoma, ndolonganji kuenda ovitunda.​—⁠Esituluilo 5:​9, 10; 14:​1, 3.

7. Usoma wa Suku u kasi oku viala cilo kilu, wa li pongiyila oku viala ilu lieve liosi. Oku konomuisa ondaka eyi yepanduvali, ci tu sanjuisa calua. Embimbiliya lieca uvangi wokuti Yesu wa vialekiwa komangu Yusoma. Cilo, eye o kasi ale oku viala, kuenda votembo yi keya oka viala ilu lieve liosi, kuenje ovitumasuku viosi tua konomuisa ndeti vika tẽlisiwa muẽle. Tua kũlĩha ndati okuti Usoma wa Suku u kasi ale oku viala cilo? Kuenda otembo yipi uka viala ongongo?

[Atosi pombuelo yamẽla]