Kuata Ukamba la Suku

Ungombo Umue wa ku Kapako Mateo 18:​12-14

‘ANGA Suku wa ndi kapako?’ Nda wa li pulile ale ndoco, kũlĩha okuti haveko lika wa siata oku ci linga. Valua pokati ketu eci tu liyaka locitangi cimue, tu li pula nda Ululiki woluali luosi o lete ohali tu kasi oku tala. Tu sukila oku lipula ndoco: Anga hẽ Yehova Suku wa kapako omunu lomunu? Yesu, omo lioku kũlĩha ciwa Yehova, eci a kala palo posi wa ta olusapo lumue lueca etambululo kepulilo eli.

Yesu wa fetika olusapo luaco poku tukula upange wungombo hati: “Nda umue o kasi locita colomeme, kuenje yimue ya nyelela, ka si hẽ olomeme akũi ecea lecea kolomunda ha endi oku sanda eyi ya nyelela? Ocili mopia lene siti, Nda o yi sanga o yi sanjukila ca lua, akũi ecea lecea ka via nyelile ci sule. Oco hacipango ca Isieneko o kasi kilu okuti kamue kamosi kava vatito ka taka.” (Mateo 18:​12-​14) Tu kũlĩhĩsi ndomo olusapo lua Yesu lu lekisa ocikembe Yehova a kuetele afendeli Vaye.

Ungombo wa kapako omeme lomeme. Nda pa nyelela yimue, eye o sukila oku kũlĩhĩsa eyi ya nyelela. Eye wa kũlĩha onduko yomeme lomeme. (Yoano 10:⁠3) Nda pocita colomeme pa nyelela yimosi, ungombo uwa o yi sandiliya toke eci a yi sanga. Poku ci linga, ka kapi kohele 99 a sia konyima. Olonjanja vimue angombo va enda oku kongela oviunda viavo pamosi.a Eli olio esunga lieci ungombo una polomeme viaye pa nyelela yimosi a sila olomeme viaye lungombo ukuavo okatembo kamue, oku vi tata. Eci a sanga eyi ya nyelile, eye o sanjuka calua. Kuenje o kapa omeme yaye kapepe ha tiuka layo vocunda.​—⁠Luka 15:​5, 6.

Yesu poku lombolola olusapo olu, wa popia okuti Suku ka yongola okuti “kamosi kava vatito ka taka.” Yesu wa lunguile olondonge viaye oku yuvula oku kapela ocilondokua ‘komanu vana vo kolela.’ (Mateo 18:⁠6) Oco hẽ, nye olusapo lua Yesu lu tu longisa catiamẽla ku Yehova? Yehova, Ungombo umue o kuetele ocikembe olomeme viaye, oku kongelamo “vatito,” okuti vana ka va kapiwileko loluali lulo. Pole, kovaso a Suku, afendeli vaye vosi va kuete esilivilo.

Nda o yongola oku kapiwako la Suku, momo lie ku lilongisila olonumbi via Yehova Suku, Ungombo wa Velapo, loku kala ekamba liaye? Poku ci linga o pondola oku kuata ekolelo ndeli liupostolo Petulu, una wa yeva olusapo lua Yesu luatiamẽla komeme ya nyelela. Petulu wa soneha hati: “Ohele yene yosi yi yeki [ku Suku] momo eye o vu lava.”​—⁠1 Petulu 5:⁠7.

[Etosi pombuelo yemẽla]