Wa Kuama Ongangu ya ‘Kafeko u Isareli’

KUNYAMO wo 2006, eci kua kambele olosemana vivali Konjivaluko yolofa via Yesu, kolupale luo Praia Grande, ko Brasil, epata lia Sales, lia soneha olonduko viomanu va yonguile oku laleka. Kafeko umue wa kala lanyamo epandu o tukuiwa hati Abigayl, wa tambulavo okokanda kamosi kelaleko, kuenje vo pulisa omunu eye a yonguile oku laleka.

Kafeko wa tambulula hati: “Ndi ka eca kulume umue wa siata oku ndi yolaisa.”

Olonjali viaye vio pulisa hati, “Ulume waco helie?”

Eye wa kumbulula hati, “Ulume umue endela komangu yalola.”

Noke yoloneke vikuãla, Abigayl wa lekisa ulume waco kolonjali viaye. Ulume waco o tukuiwa hati Walter, onjo yaye ya kala ocipepi Lonjago Yusoma. Walter eci a kuata 28 kanyamo, wa tiñuha lekãlu kuenje ovolu aye a fa. Tunde eci a linga ocilema, pa pita ale 15 kanyamo. Eye o kuete akuenje vavali va kasi oku u lava. Eteke limue olonjali via Abigayl via sapuila Walter okuti omõlavo o yongola oku wĩha elaleko limue.

Kesulilo liombangulo, Abigayl wa popia laye hati: “Vamanji vekongelo lietu, va tambula otuikanda tuoku laleka omanu valua oku enda Vonjango Yusoma. Ame ñuete lika okokanda kamosi koku ku laleka ove. Nda ove kua endele sika kuata omunu nda laleka. Pole, nda ove wa enda, ndika kuata omunu umosi kuenje ndika sanjuka. Handi vali cika sanjuisa calua Yehova.”

Keteke Lionjivaluko, eci Olombangi Via Yehova via kala oku yelisa Onjango Yusoma loku pongiya ovina vi sukiliwa, Abigayl opo a kala. Kekumbi liaco, eci Walter a kala oku pita wa mola Abigayl kuenje wa talamisa ekãlu a kala oku endela. Eye wa yulula epito liekãlu yu wa pulisa Abigayl eci va kala oku linga. Abigayl wo sapuila hati, va kala oku pongiya Onjango Yusoma oco eci eye eya a sanjuke.

Koñolosi yaco Abigayl wa sakalalele calua. Momo ohundo ya fetikile ale pole Walter handi ka pitilile. Noke kafeko wa mola okuti eye kumue lakuenje vaye va pitila. Kafeko wa fetika oku memena omo liesanju a kuata. Eci ohundo ya pua, Walter wa sapuila kafeko hati wa si oku enda kolupale lukuavo, pole wa li tiukamo omo kafeko wo laleka oku iya Konjivaluko. Eye wa amisako hati: “Ohundo eyi, oco ocina ca velapo nda sukilile oku yeva.” Eye wo pinga Embimbiliya kuenda wa fetika oku lilongisa loku endaenda kolohongele.

Noke yokatembo kamue, mukãi wa Walter wa yonguile oku kũlĩha Abigayl, kafeko una mume waye a siata oku tukula calua. Eci a lisanga laye, wa sola calua ovina a lilongisa kuenje wa limbuka okuti Abigayl, omõla umue uwa. Eye wa popia hati: “Kaliye nda limbuka esunga lieci mume wange a kuetele esanju lialua.”

Cilo, Walter o kasi oku amamako oku lilongisa kuenda endaenda kolohongele. Eye wa siata oku eca atambululo loku sapuilako vakuavo ovina a kasi oku lilongisa. Ulandu wa Abigayl u tu ivaluisa kafeko u Isareli, una wa kuatisa Namana oku kũlĩha Yehova, Suku yocili.​—⁠2 Olosoma 5:​2-14.