Kuata Ukamba la Suku

Isia Yolosiwe Etundilo 22:​22-24 NW

‘I SIA yolosiwe . . . Eye Suku vonjo yaye yi kola.’ (Osamo 68:⁠5) Olondaka evi vi tu longisa ovina viatiamẽla kocikembe Yehova Suku a kuetele vana va suka. Ohenda yaye lomãla vana okuti olonjali viavo via fa, yi limbukiwila Kocihandeleko a ecele ku va Isareli kosimbu. Tu konomuisi ondaka “osiwe”a yi molẽha onjanya yatete kelivulu Lietundilo 22:​22-24.

Suku wa lungula hati: “Ka ci tava okuti o fukĩlĩsa . . . osiwe.” (Ocinimbu 22 NW) Eli hepingiloko lioku kuatisa olosiwe, pole, ocihandeleko ca Suku. Omãla vana okuti va isiavo va fa, ka va kuatele u o va teyuila. Omo liaco, ka ca tavele oku “fũkĩlisa” omãla vaco. Vambimbiliya amue ondaka oku “fũkĩlisa” va yi pongolola okuti oku “kangisa,” oku “talisa ohali” kuenda oku “sukilisa omuenyo.” Oku tata lãvi olosiwe ekandu linene kovaso a Suku. Momo lie?

Ocihandeleko caco ca amisako hati: “Nda wu va fũkĩlisa kuenje va mbilikiya, ame njeva muẽle evilikiyo liavo.” (Ocinimbu 23 NW) Kocinimbu 22, ondaka “o fukĩlisa,” yi tiamisiwila komunu umosi, pole kocinimu 23, ondaka “wu va fukĩlisa,” yi tiamisiwila komanu valua. Omanu vosi vofeka va sukilile oku pokola konumbi eyi ya Suku. Yehova o lavulula kuenda o vonguila etũi liaye kolosiwe, kuenje o vi kuatisa eci vi vilikiya kokuaye.​—⁠Osamo 10:14; Olosapo 23:​10, 11.

Nye ca enda oku pita eci umue a talisa ohali osiwe, kuenje yi vilikiya ku Suku loku lila? “Onyeño yange yi wenguka, ndu wipayi losipata.” (Ocinimbu 24) Poku konomuisa ocinimbu eci, elivulu limue li popia ndoco: “‘enyũlu liange li sanya,’ eyi onjila yimue yoku lekisa omunu o kuete onyeño ya piãla.” Limbuka okuti Yehova ka ecelele okuti onganji yimue ko Isareli yi kisika omanu oku pokola kocihandeleko. Suku eye wa enda oku sombisa vana va talisa ohali olosiwe.​—⁠Esinumuĩlo 10:​17, 18.

Yehova ka pongoloka. (Malakiya 3:⁠6) Utima waye u kuetele ohenda omãla ka va kuete va isiavo. (Tiago 1:​27) Kolela okuti Isia yolosiwe eci a mola ndomo omãla vana ka va kuete oñlonjali viavo va talisiwa ohali, o tema. Vosi va kangisa omãla volosiwe ka va ka puluka ‘keteke lionyeño ya Yehova.’ (Sofoniya 2:⁠2) Olondingaĩvi viaco vika limbuka okuti eci “ci linga usumba oku fa peka lia Suku o kasi lomuenyo.”​—⁠Va Heveru 10:31.

[Etosi pombuelo yemẽla]