Apulilo Valingiwa Lavakuakutanga
Otembo yipi Satana a tundisiwa kilu?—Esit. 12:1-9.
Ndaño elivulu Liesituluilo ka li tukula otembo Satana a tundisiwa kilu, pole, li lekisa ovolandu a tu kuatisa oku limbuka otembo a tundisiwa kilu. Ulandu watete, u lekisa oku tumbikiwa Kusoma wa Mesiya. Noke “kilu kueya ovita” via tundisa Satana kilu.
Ovisonehua vi lekisa okuti, “oloneke via vakualofeka” via sulila kunyamo wo 1914, kuenje Usoma wa Suku wa tumbikiwa kotembo yaco.a (Luka 21:24) Uyaki waco wa tundisa ndati Satana kilu?
Elivulu Liesituluilo 12:4 li popia hati: “Ocinyoha ca talama kovaso yukãi wa soka oku cita, [okuti], nda o cita, ci lia omõlaco.” Ulandu owu u lekisa okuti, Satana wa yonguile oku nyõla Usoma wa tumbikiwa kotembo yaco. Ndaño Yehova wa tateka Satana oco kaka tẽlise ocimãho caye cĩvi, pole, wa nõlelepo onjila yoku nyõla Usoma waco. Kuenje, wa likolisilako oku tẽlisa ocimãho caye. Eli olio esunga lieci ‘Mingeli kumue lovangelo vaye,’ va tundisa lonjanga ‘ocinyoha lovangelo vaye’ kilu, oco ka vaka nyõle Usoma wa Suku wa tumbikiwa. Ulandu owu u lekisa okuti Satana wa tundisiwa kilu noke yoku tumbikiwa Kusoma kunyamo wo 1914.
Onepa yikuavo tu sukila oku kũlĩhĩsa, epinduko Liakristão olombuavekua. Ovisonehua vi lekisa okuti, epinduko liaco, lia fetika noke yoku tumbikiwa Kusoma.b (Esit. 20:6) Ovisonehua ka vi lekisa okuti, Akristão olombuavekua va kuatisa Yesu kuyaki woku tundisa Satana kilu lovangelo vaye. Pole, vi lekisa okuti, va tundisiwa kilu kotembo kua fetika epinduko lia vamanji ya Kristu.
Embimbiliya ka li lombolola loku teta onimbu otembo Satana a tundisiwa kilu kumue lolondele viaye. Pole, ulandu waco citava okuti wa pita noke liunyamo wo 1914 eci Yesu Kristu a vialekiwa komangu Yusoma.
[Atosi pombuelo yamẽla]
a Tanga elivulu losapi hati, Embimbiliya Li Longisa Nye? kemẽla 215-218.
b Tanga Utala Wondavululi 1 ya Suku yunyamo wo 2007 kemẽla 30-31, kocinimbu 9-13.