2. Tanga Lutima wa Sunguluka
Anga hẽ o kuete ekamba limue okuti olonjanja viosi li ku sapuila lika ovina vĩvi viatiamẽla komunu umue kua la mola? Eci ove o li sanga lomunu waco, olondaka ka via sungulukile viekamba liove, viu ku tateka hẽ oku limbuka ovituwa viwa loku loñoloha kuaye? Cimuamue haico ca siata oku pita Lembimbiliya.
UPOSTOLO Paulu wa eca elungulo liatiamẽla kohele tu pondola oku pita layo eci tu tanga Embimbiliya lovisimĩlo ka via sungulukile. Poku sonehela va Yudea vo koloneke viaye, Paulu wa popia ndoco: “Ndi va imbila uvangi okuti va kuetele Suku ombili, puãi ha lukũlĩhiso ko.”—Va Roma 10:2.
Kocita catete, va Yudea valua ka va tavele Kovisonehua via va Heveru via lekisile okuti Yesu eye Mesiya. Yesu u Nasara, wa lekisa ciwa ovina ndomo via tukuiwile Vovisonehua via va Heveru, via tẽlisiwila vokuaye. Puãi, vana va tĩlisile ovitima viavo, ka va kuatele elomboloko Liondaka ya Suku.
Nye tu lilongisila kulandu owu? Tu sukila oku tanga Embimbiliya lovisimĩlo via sunguluka. Momo ovisimĩlo ka via sungulukile, vi pondola oku tateka omunu oku kuata elomboloko Liembimbiliya.
Tu konomuisi ulandu wulongisi umue wetavo ko Carolina do Norte, kofeka yo Estados Unidos. Eye o tenda Embimbiliya ndoco: “Olio elivulu limue lia sonehiwa lomanu hailio li kuete lika ovisimĩlo viomanu va litepa kuenda ka kuli omunu umue ka lueya poku eca olonumbi viatiamẽla komuenyo.” Nda omunu poku tanga Embimbiliya o li tenda “ndelivulu lia sonehiwa lomanu,” hailio ka lia tundile ku Suku, anga hẽ o ka tava oku pokola kolonumbi vialio?
Vosi yetu tu vetiyiwa oku tanga Embimbiliya lombili. Upostolo Paulu poku pandiya va Berea vo koloneke viaye, wa popia hati: “Va yeva ondaka lombili kuenje, oloneke viosi, va tanga tanga ovisonehua oku kũlĩhisa nda hẽ ovina viaco viocili nda ndati.” (Ovilinga 17:11) Oco ove o kuate elomboloko liwa Liondaka ya Suku, o sukila oku yi tanga lovisimĩlo via sunguluka ndeci ca linga va Berea. Nda wa tanga Embimbiliya lutima wa sunguluka, o ka limbuka okuti esapulo Liusovoli walio, li sanjuisa cocili.