Oku Sanga Ovokuasi a Solekiwa

OVE hẽ, wa sangele ale ukuasi pocitumãlo cimue okuti, kua simĩle oku u sanga? Manji umue o tukuiwa hati Ivo Laud, kofeka yo Estonia, wa pita lulandu waco, keteke 27 kosãi Yelombo yunyamo wo 2005. Eye wa kala oku kuatisa manji umue wa kuka o tukuiwa hati, Alma Vardja, wa yonguile oku teya okanjo kamue kosimbu, va enda oku soleka ovikuata vimue. Osimbu va kala oku teya okanjo kaco, va sanga evaya limue vocimano. (1) Eci vopa evaya liaco, va sanga ututa umue mua kala okasia mua solekiwa ovokuasi! Ovokuasi api a kalamo? Helie wa va solekamo?

Okasia yaco, ya muñiwa lolopapelo vimue. (2) Vokati kaco, mua kala alivulu Olombangi Via Yehova, oku kongelamo ovipama vielilongiso Viutala Wondavululi, oku kongelamo viunyamo wo 1947. (3) Ovipama viaco, via sonehiwa peka kelimi lio Estonia. Kotulokasia tumue, kua sonehiwa onduko yomunu wa soleka alivulu aco. Mua kalavo olopapelo via sonehiwa la manji Villem Vardja, ulume wa Alma, osimbu a kala oku sombisiwa. Mua sangiwavo ulandu wotembo a kala vokayike. Momo lie a kapiwila vokayike?

Manji Villem Vardja wa kala oñuatisi yakulu Vekongelo lio Tartu. Noke, wa kuatisavo Ekongelo volupale luo Otepää, kofeka yo Estonia. Citava okuti, wa fetika oku lilongisa Embimbiliya osimbu handi Uyaki Wavali Voluali luosi ka weyile. Noke lianyamo amue, keteke 24, kosãi ya Cembanima, yunyamo wo 1948, asualali Vocitundo Cungangala, vambata Manji Vardja omo liupange waye woku kunda. Eci a pulisiwa lolosipayu, ovo ka va tavele kovina a popia, kuenje, vo kisika oku tukula olonduko via vamanji vakuavo. Omo okuti, olosipayu ka via tavele kovina viosi manji a popia, wa tumiwa kocila coku kangisila omanu ko Rusia, kuna a kala vokayike ekũi lianyamo.

Manji Villem Vardja, wa pandikisa lekolelo ku Yehova, toke kolofa viaye keteke 6 kosãi Yelombo, kunyamo wo 1990. Ukãi waye, ka kũlĩhĩle nda ulume waye wa solekele alivulu aco. Eye ka sapuilileko ukãi waye okuti wa soleka alivulu. Momo wa ci lingila oco okuti, nda wa pulisiwa lolosipayu, ka tukula apa a solekiwa. Momo lie a solekela alivulu aco? Eye wa soleka alivulu aco, momo wa kũlĩhĩle okuti, pamue Olosipayu vio União Sovietika, vina via tukuiwile hati, KGB, viya volonjo Violombangi Via Yehova, oku sandiliya alivulu. Manji Vardja, wa solekele alivulu locimãho cokuti, nda olosipayu vio KGB, viambata alivulu amue, vamanji va kuata okulia kuespiritu. Alivulu akuavo, a sangiwa kunyamo wo 1990, kotembo yondombo. Alivulu amue, a sangiwa volupale luo Tartu, kombuelo yo Estonia. Manji Villem Vardja, eye wa solekele alivulu vofeka yaco.

Momo lie alivulu aco tu a tukuila hati, ukuasi? Momo a sonehiwa lutate peka, loku a soleka ciwa, kuenda a lekisa ndomo Olombangi Via Yehova via kapeleko okulia kuespiritu kotembo yaco. (Mat. 24:​45) Ove hẽ, wa kapako alivulu a sandekiwa lukuenje wa lunguka ana wa siata oku tambula vekongelo liove? Amue pokati kalivulu aco, Utala Wondavululi, kelimi lio Estonia, kuenda wa pongoluiwavo kueci ci pitahãla 170 kalimi akuavo.