Ove hẽ wa Sokiya Otembo Yoku Lilongisa Embimbiliya?
UNYAMO wa pita, Osungu Yakulu Yolombangi Via Yehova, ya sapula epongoloko lia lingiwa kesokiyo liolohongele oco tu kuate otembo yalua yoku lilongisa Embimbiliya, kuenda oku sapela lepata lietu. Nda ove usongui wepata, o sukila oku amamako oku linga elilongiso Liembimbiliya, oco li pamise ukãi wove kuenda omãla vove konepa yespiritu. Olohueli vina ka vi kuete omãla, vi sukila oku lilongisila kumuamue Embimbiliya. Vamanji vana ka va kuelele okuti, ka va kuete ovikele vioku tata epata, va sukila oku pesila otembo yaco kelilongiso Liembimbiliya pokolika.
Vamanji valua, va siata oku eca olopandu keliangiliyo liaco liatiamẽla Kelilongiso Vepata koñolosi. Ukulu umue wekongelo o tukuiwa hati Kevin, wa popia hati: “Vekongelo lietu, vamanji va pandula calua omo lieliangiliyo liaco. Etu tuakulu vekongelo, tua siata oku sapela ndomo tu kuama onumbi Yosungu Yakulu Yolombangi Via Yehova, yatiamẽla koku linga elilongiso vepata koñolosi.”
Manji umue ukãi o tukuiwa hati, Jodi okuti, ulume waye ukulu wekongelo, wa soneha hati: “Tu kuete omãla vatatu vafeko. Umue o kuete 15 kanyamo, ukuavo 11, umalẽhe waco o kuete anyamo 2. Tua ilukila ndopo vekongelo lielimi lioku ilaika. Tua siata oku likolisilako loku sokiya otembo yoku pongiya ovipama viosi violohongele. Omo liepongoloko liaco, tua sokiya eteke limue tu linga elilongiso vepata koñolosi!”
Manji umue o tukuiwa hati, John lukãi waye JoAnn okuti, akundi vavelapo, va soneha hati: “Olonjanja vimue, tua siata oku linga Elilongiso liepata vepuluvi likuavo, omo liovikele vekongelo. Eliangiliyo liaco, ombanjaile yimue ya tunda ku Yehova yoku tu pamisa konepa yespiritu. Omo liaco, tu sukila oku sokiya otembo yoku linga elilongiso liaco.”
Umalẽhe umue o kuete ci pitahãla 20 kanyamo o tukuiwa hati, Tony, haeye ka kuelele, wa siata oku linga elilongiso liaye lio pokolika Vovali koñolosi. Ovipama violohongele, wa siata oku vi pongiya oloneke vikuavo viosemana. Eye wa popia hati: “Nda siata oku lavoka lesanju eteke Liavali vosemana.” Momo lie? “Momo eteke liaco koñolosi, ndi pesila otembo yange ku Yehova.” Eye wamisako hati: “Vokuenda kuolowola vivali, ndi lilongisa ovina vi ndi kuatisa oku pamisa ukamba wange la Yehova. Oku kuata otembo yalua yoku lilongisa, ci ndi kuatisavo oku sokolola ovinimbu Viembimbiliya nda tanga.” Onima yipi a siata oku tambula? Manji Tony wa popia hati: “Elungulo lia Yehova lia siata oku vetiya utima wange okuti, kosimbu ci sule.” Anga hẽ, wa lekisa ongangu yiwa? Eye wamisako loku popia hati: “Velivulu Estudo Perspicaz nda tangamo catiamẽla kukamba wa kala pokati ka Daviti la Yonatão. Nda limbuka ocituwa ca Yonatão coku lieca olumue. Ulandu waye, wa ndi kuatisa oku limbuka elomboloko lioku kala ekamba liwa. Omo liaco, nda siata oku lavoka lesanju eteke Liavali vosemana, momo koñolosi yaco ndi lilongisa ovina vialua vi ndi pamisa kespiritu!”
Omo liaco, afendeli vosi va Yehova va pondola oku kuatisiwa nda va sokiya otembo yoku linga elilongiso Liembimbiliya pokolika kuenda vepata.