Vakuakutanga Va Pula

Anga hẽ, Yesu Eye Ungelo Unene Mingeli?

▪ Etambululo liaco li lekisa okuti eye muẽle. Apata alua a kuete ocituwa coku luka omunu olonduko vialua. Cimuamue haico catiamẽla kolonduko vi sangiwa Vembimbiliya. Ndeci, Yakoba wa tukuiwavo hati, Isareli. (Efetikilo 35:10) Upostolo Petulu wa tukuiwa lolonduko vitãlo via litepa ndeci: Sumone, Simono, Petulu, Kefa, kuenda Simono Petulu. (Mateo 10:2; 16:16; Yoano 1:42; Ovilinga 15:7, 14) Uvangi upi u lekisa okuti, Mingeli oyo onduko yikuavo ya Yesu? Kũlĩhĩsa ovolandu akuãimo a sangiwa Vovisonehua.

Embimbiliya li tukula olonjanja vitãlo onduko Mingeli, ungelo wa velapo. Velivulu lia Daniele onduko yaco ya tukuiwa olonjanja vitatu. Kelivulu lia Daniele 10:13, 21, tu tangako okuti, ungelo umue wa tumiwile oku linga upange, wa kuatisiwa la Mingeli una wa tukuiwa hati, “umue pokati kolombiali vinene,” haeye ‘ombiali yomanu.’ Noke, kelivulu lia Daniele 12:1, tu tangako okuti, koloneke via sulako, “ku katuka Mingeli, ombiali yinene haeye ombindikiyi yomãla vepata liene.”

Ulandu ukuavo wa Mingeli, u sangiwa kelivulu Liesituluilo 12:7, kuna ku lekisa okuti, “Mingeli lovangelo vaye,” va linga uyaki umue wa koka oku tundisiwa kua Satana Eliapu kilu kumue lovangelo vaye vãvi.

Ivaluka okuti, vovolandu a lomboluiwa ndeti, Mingeli wa tukuiwa hati, ungelo umue ukuavita, o yaka haeye o teyuila omanu va Suku, kuenda o liyaka la Satana unyali wa velapo wa Yehova.

Kelivulu lia Yuda kocinimbu 9, ku tukula Mingeli hati, “ungelo unene.” Ondaka yokuti, “ungelo unene,” yi lomboloka ‘ungelo wavelapo,’ kuenda Vembimbiliya ondaka yaco yi tiamisiwila komunu umuamue. Ocinimbu cikuavo ci tukula ondaka ungelo unene, ci sangiwa kelivulu lia 1 Va Tesalonike 4:16, kuna Paulu a lombolola catiamẽla ku Yesu wa pinduiwa hati: “Ñala [Yesu], eye muẽle, o tunda kilu levilikiyo, londaka yungelo unene, kuenda lolumbeta.” Omo liaco, vovinimbu evi, Yesu Kristu eye muẽle o tukuiwa hati, ungelo unene, ale ungelo wa velapo.

Nye tu lilongisa vulandu wa lomboluiwa ndeti? Ulandu owu u lekisa okuti, Yesu Kristu eye Mingeli ungelo unene. Olonduko viaco ndeci, Mingeli, (yi lomboloka okuti, “Helie wa Lisoka la Suku?”) kuenda onduko Yesu, (yi lomboloka okuti, “Yehova Onjovoli.”) Olonduko evi, vi lekisa ocikele a kuete koku teyuila uviali wa Suku. Elivulu lia Va Filipoi 2:9, li popia hati: “Suku wo kemainya kuenje wo luka onduko ya piãla olonduko vikuavo viosi.”

Tu sukila oku limbuka okuti, omuenyo wa Yesu ka wa fetikile poku citiwa kuaye palo posi. Osimbu ka citiwile handi, Maria wa pasuisiwa lungelo umue wo sapuila hati, o ka mina omõla ulume lekuatiso liespiritu sandu, kuenda o ko luka hati, Yesu. (Luka 1:31) Yesu vokuenda kupange waye woku kunda, olonjanja vimue wa lombolola eci catiamẽla komuenyo waye wo kilu.—Yoano 3:13; 8:23, 58.

Omo liaco, Mingeli ungelo wavelapo, oyo onduko ya Yesu osimbu keyile handi palo posi. Noke yepinduko liaye, eci a tiukila kilu wa tambula vali ocikele caye ca Mingeli, ungelo wa velapo, ‘oco a muise Suku Tate ulamba.’—Va Filipoi 2:11.