Tu Kuateli Ohenda Vana va Sumua
ETEKE limue, manji George la manji Manon, vo kofeka yo Olanda, va kundila olondaka viwa Viusoma ukãi umue wa kuka calua, o tukuiwa hati, Rie okuti wa kala ulika. Noke, va limbuka okuti, wa fisa ulume waye watete lulume wavali, lomõlaye kuenda wa kuata uvei wevalo liasokoluilo. Osimbu vamanji va kala oku vangula, eye ka va tambuluile, momo ka yonguile oku kuata lavo ukamba.
Noke manji George, wa vangula la manji Manon hati, eci va tiuka oku u pasuisa, vo nenela ocitungu coloneleho, momo wa kala ulika, kuenda wa sumuĩle calua. Eci va tiuka konjo yaco, ka vo sangeleko. Kuenje, va sokiya oku tiuka eteke likuavo. Pole, eci va tiuka onjanja yikuavo, lomue wa va yuluila epito. Ndaño okuti va endele konjo yaco olonjanja vialua, ka va sangeleko omunu. Kuenje, va sima okuti, ukãi waco wa kala oku va tila.
Eteke limue, manji George wa sanga ukãi waco konjo. Eye wa pinga ongecelo omo olonjanja vialua ka vo sangele konjo, kuenda wa lombolola hati, wa kala kosipitali. Noke wa popia hati: “Sia ivaleleko ovina wa ndi sapuili. Nda fetika oku tanga Embimbiliya!” Kepasu likuavo, va fetika oku longisa Embimbiliya ukãi waco.
Osimbu ukãi waco a kala oku lilongisa Embimbiliya, esanju liaye lia li vokiya. Omo okuti otembo yosi wa kala konjo, wa fetika oku kundila omanu va enda oku u nyula. Eye ka ponduile oku endaenda kolohongele olonjanja vialua omo lioku vela, pole, wa sanjukila vamanji va enda oku u nyula. Eci a tẽlisa 82 kanyamo, wa endele kohongele yimbo kuenje, wa papatisiwa.
Manji Rie eci pa pita olosãi vimue noke yepapatiso liaye, wa fa, pole, omanu va sanga ukanda a soneha. Vukanda waco, wa lombolola ohali yaye yoku kala ulika, loku kuka kuenda wa tukula esilivilo lioku lekisa ohenda komanu. Manji Manon wa popia hati: “Eci nda tanga ukanda waco, nda kuata ohenda yalua. Pole, nda sanjuka omo okuti, Yehova wa tu kuatisa oku lekisa ohenda kukãi waco.”
Yehova, eye ukuangangu yoku lekisa ohenda kokuetu. (Va Efe. 5:1, 2) Omo liaco, tu kuateli ‘ohenda omanu’ tu sanga kupange woku kunda, oco tu tambule asumũlũho kuenda, tu ‘lekisi okuti, tuafendeli va Suku.’—2 Va Kor. 6:4, 6.