OSAPI YOKOÑOÑO: MOMO LIE OHALI YA LUILA? ETEKE LIPI YI KA PUA?
Omanu Valua va Siata Oku Pondiwa Ndaño ka va Kuete Eko!
Umalẽhe londuko Noelle, wa solale calua oku soneha oviluvialuvia. Eteke limue luteke kotembo yowuya, wa kala kocitali konjo yavo kuenje wa kupukila vociva ca kala posamua onjo yavo. Eye wa fa eci pakambele olosemana vivali oco a tẽlise anyamo akuãla.
Charlotte, Daniel, Olivia, kuenda Josephine, Olonduko vimue via tukuiwa pokati keci ci soka 26 komãla va kuete anyamo epandu, kuenda anyamo epanduvali, viopiwa pokati keci ci soka 20 va loyiwa kosikola yo Connecticut, ko Estados Unidos, keteke 14 kosãi ya Cembanima yunyamo wo 2012. Keteke lioku va kenda, Obama okuti eye Ombiali yofeka yaco wa tukula olonduko viomãla vaco, kuenje wa sapuila kapata avo hati: “Tu yongola okuti ka ku kala vali ovilunga.”
Umalẽhe umue o tukuiwa hati, Bano o kuete 18 kanyamo, va tunda ko Iraque kunyamo wo 1996 lolonjali viaye kuenda va ilukila ko Noruega. Akamba vaye va enda oku u tukula hati Olosongo Viekumbi. Pole keteke 22 Yevambi Linene wo 2011 Bano wa kala umue pokati keci ci soka 77 komanu va pondiwa longangala yimue ya popia hati: “Ngeceli . . . omo nda ponda etendelo litito liomanu.”
Ulandu owu u sumuisa, wa lekisiwa olonjanja vialua voluali. Sokolola ño esumuo kuenda evalo litunda koku litusula kuoviendelo, kevĩho, kungangala, kovilemawe kuenda kovilunga vikuavo. Omanu valua va siata oku pondiwa ale oku talisiwa ohali ndaño ka va kuete eko!
Omanu vamue va siata oku lundila Suku loku sima okuti, Ululiki wetu omanu ka va kapeleko. Vakuavo va popia vati Suku olete ohali yetu pole, ka tu kuatisa. Vamue va popia okuti ovitangi viaco via sokiyiwa ale. Omanu va siata oku sima okuti, ovitangi viaco lalimue eteke vi ka puako. Pi tu pondola oku sanga atambululo asuapo? Vocipama ci kuãimo tu ka kũlĩhĩsa Vondaka ya Suku atambululo eci ci koka ohali kuenda ndomo yi ka puako.