Anga hẽ o Paskoa Ocipito Cimue Cakristão?

O Paskoa vo Encyclopædia Britanica, ya tukuiwa okuti “ocipito ca velapo conembele Yakristão coku ivaluka Epinduko lia Yesu Kristu.” Eci ci lekisa okuti o paskoa ocipito cimue Cakristão?

Oco tu kũlĩhe esilivilo liocina cimue ca pangiwa, tu sukila oku kũlĩhisa ovina via kongelamo. Cimuamue haico, oco tu limbuke nda o Paskoa ocipito Cakristão, tu sukila oku kũlĩhĩsa ovina via kongela vo Paskoa.

Catete Yesu ka vetiyile olondonge viaye oku ivaluka epinduko liaye, pole wa vi vetiya oku ivaluka olofa viaye. Upostolo Paulu wa tukula epuluvi liaco hati: “Ondalelo ya Ñala.”​—1 Va Korindo 11:20; Luka 22:19, 20.

Handi vali, o Encyclopædia Britannica yi lekisa okuti, ovihilahila vialua vio Paskoa “ka vi kuete elitokeko lepinduko” lia Yesu, “pole via tunda kovihilahila violuali.” Catiamẽla kovindekaise viasala kuenda ondimba via siata pocipito co Paskoa, elivulu limue lietavo li lekisa ndoco: “Esala li lomboloka omuenyo wokaliye, u nyõla olofa okuti, (oku kõla) kuociwala cesala.” Elivulu liaco liamisako ndoco: “Ondimba ya kũlĩhiwa okuti ocinyama cimue cilicita calua, kuenje ya linga ondimbukiso yokuiya kuotembo yonjovo.”

Ulongisi umue londuko Philippe Walter, wa lombolola ndomo ovihilahila viaco via fetika oku panga onepa kocipito co Paskoa. Eye wa soneha okuti, poku linga okuti atavo esanda a kongeliwa katavo akristão,” ca ecelela oku kongela ovipito viesanda vioku sambiliya “oku sulila kuokuenye, kuenda oku iñila votembo yonjovo” lepinduko lia Yesu. Walter wamisako ndoco, oku kongeliwa “kuovipito Viakristão” vokalendariu ketavo liesanda ca kuata esilivilo, momo ca ecelela okuti omanu valua va tava ketavo.

Oku “kongeliwa kuovihilahila viaco” ka kua lingiwile osimbu handi ovapostolo va kala komuenyo, momo va enda oku pisa ovihilahila viaco viatavo esanda. (2 Va Tesalonike 2:7) Upostolo Paulu wa popia hoti, noke “eci nunda, pa katuka alume va vangula ovina via penga ha va koki oloñame okuti vi va kuama.” (Ovilinga 20:29, 30) Kuenda kesulilo liocita catete Upostolo Yoano wa soneha okuti, alume vamue va kala ale Akristão vesanda. (1 Yoano 2:18, 26) Eyi ya linga onjila yimue ya ecelela oku tava kovihilahila viesanda.

Vamue va sima okuti, oku kuama ovihilahila vimue vio Paskoa hacĩviko​—momo ci va kuatisa oku sanga elomboloko liepinduko lia Yesu. Pole, Paulu lalimue eteke a tavele kocisimĩlo caco. Ndaño wa ñualiwile lovihilahila viaco viatavo esanda vokuenda kuo vongende a linga vuviali wo Roma, eye lalimue eteke a kuamele vimue pokati kovihilahila viaco, oco a kuatise omanu oku sanga elomboloko liasuapo liatiamela ku Yesu. Pole, eye wa lungula Akristão hati: “Ko ka kutiwili kokanga ka ya lisokele kumosi lava ka va tavele. Momo esunga leci hesungako ci kutiwila ndati pamosi? Utanya u livala ukamba we lowelema? Oco, tundi pokati kavo, litepi lavo. Oco ca popia Yehova. ‘Kuenda leci ca vĩha ko ka ci lambi.’”​—2 Va Korindo 6:14, 17.

Ovina tua konomuisa ndeti via tu kuatisa oku sanga elomboloko lipi? Ekonomuiso liaco lia tu kuatisa oku sanga elomboloko liokuti, o paskoa hacipitoko Cakristão.