OSAPI YOKOÑOÑO | OVINJONDE VI SITULULA OVINA VI KASI KILU
Apulilo Atiamẽla Koviluvo Vi Kasi Kovailu
Wa siata hẽ oku lipula catiamẽla kovailu kuenda oviluvo vi kasiko? Nda wa siata oku linga epulilo liaco, ku kasi lika liove. Vokuenda kuanyamo alua, omanu va siata oku linga epulilo liaco. Omanu vamue va tava okuti kovailu kuli omanu vana va fa osimbu, kuenda tu sukila oku va sumbila. Vakuavo va sima okuti ocitumãlo cimue kuli ekalo liwa li tukuiwa hati ilu, okuti kuli ovangelo kuenda omanu vana vawa va fa. Handi vali, vakuavo va sima okuti ovailu, onjo yolosuku vialua.
Omanu valua va siata oku popia okuti ka tua kũlĩhile lacimue catiamẽla kovailu momo ka kuli omunu umue wa endeleko okuti o pondola oku tu ci lomboluila. Pole, ovisimĩlo viaco, ka via sungulukile. Yesu Kristu wa kala kovailu osimbu handi keyile palo posi. Eye wa sapuila kasongui vatavo hati: “Momo sia tundile kilu oku linga ocipango cange, puãi ndeya oku linga ocipango cu wa numa.” Yesu wa ecavo esapulo limue kolondonge viaye poku popia hati: “Konjo ya Tate kuli ovitumãlo vialua vioku kala.”—Yoano 6:38; 14:2.
Isia ya Yesu, Suku okuti onduko yaye Yehova, kuenda “onjo” ya Yehova kovailu. (Osamo 83:18) Yehova Suku kuenda Yesu Kristu ovo lika va pondola oku lombolola ciwa ovailu. Ovo va siata oku lombolola ovina vialua viatiamẽla kovailu lekuatiso liovinjonde vikomohĩsa va eca komanu vamue vakuekolelo.
Ocipama ci kuãimo ci ka lombolola ovinimbu vimue Viembimbiliya vi lombolola ovina alume vaco va mõla vovinjonde. Osimbu o kũlĩhĩsa ovinjonde viaco, ivailuka okuti ovailu hacitumãloko ci muiwa, okuti kuli ovina tu pondola oku kuata ale oku mola. Omo liaco, Suku ka lomboluile ovina viaco lolondaka vina okuti ovangelo ovo lika va pondola oku kuata elomboloko, pole, eca ovinjonde oco a lombolole ovina viatiamẽla kovailu lonjila yimue okuti tu pondola oku kuata elomboloko. Ovinjonde viaco, vi ka ku kuatisa oku kuata elomboloko lioviluvo vi kasi kovailu kuna kuli “ovitumãlo vialua.”