O Tetragrama okuti onduko ya Suku, Yehova, ya sonehiwa kelimi lio Heveru, yi tangiwa oku upisa konẽle yondio toke kepĩli
Anga hẽ tu pondola oku kolela okuti olohuminyo viosi via Suku vi ka tẽlisiwa ocili? Yesu wa kolelele kolohuminyo viaco, kuenje ovina a enda oku longisa via vokiya ekolelo liomanu vana va enda oku u yevelela. Kũlĩhĩsa eci eye a popia vohundo a lingila komunda, yi sangiwa kelivulu lia Mateo 5:18. Eye hati: “Ocili, mopia lene siti, osimbu ilu losi ka via pitile, lacimue ocisonehua Cocihandeleko cupiwapo, toke eci ovina evi vi tẽlisiwa.”
Ondaka yaco yitito yopiwa kolondaka vio Heveru viokuti, (iode). Oyo ondaka yatete yo Tetragrama ale yonduko yikola ya Suku, Yehova.a Vakuavisonehua la va Fariseo ka va kapeleko lika olondaka kuenda ololetala Viocihandeleko ca Suku pole, va tendele ‘olondaka viosi’ viocihandeleko ndocina cimue ci kuete esilivilo.
a Ondaka yitito yolondaka vio Helasi, yokuti iota, ya lisetahãla londaka yo Heveru yokuti (iode). Omo okuti Ocihandeleko ca Mose ca sonehiwa kuenda ca pitiyiwa kelimi lio Heveru, citava okuti Yesu wa kala oku tukula ondaka yo Heveru.
Yesu wa kala oku popia okuti, ca velapo ilu kuenda ongongo oku pita okuti olondaka viosi via tukuiwa vondaka ya Suku yi tẽlisiwa. Pole, Embimbiliya li popia okuti ilu kuenda ongongo vi kala otembo ka yi pui. (Osamo 78:69) Omo liaco, Yesu wa yonguile oku popia okuti Ondaka yosi ya Suku, ndaño okuti yitito, yi tẽlisiwa.
Anga hẽ Suku wa kapako olohuminyo viaye viosi ndaño vina okuti vitito? Ocili okuti wa vi kapako. Sokolola ulandu owu: Va Isareli kosimbu va handelekiwile oco ka va ka teye ekepa lalimue kokameme ko Paskoa. (Etundilo 12:46) Ocihandeleko caco ci molẽha ndu okuti citito. Anga hẽ, va Isareli va kuatele elomboloko lieci va sukilile oku yuvula oku teya ekepa limue liokameme? Citava okuti ka va kuatele elomboloko liaco. Yehova eye lika wa ci kũlĩhĩle. Ocihandeleko caco ca lekisile ovina via laikele oku pita la Mesiya, okuti lalimue ekepa liaye lia laikele oku teyiwa eci a pondiwa kuti wekangiso.—Osamo 34:20; Yoano 19:31-33, 36.
Olondaka via Yesu vi tu longisa nye? Etu tu pondolavo oku kolela okuti olohuminyo viosi via Yehova Suku vi ka tẽlisiwa ndaño muẽle vina vitito. Ocili okuti tu pondola oku lilongisa ovina vialua londaka yaco yitito kelimi lio Heveru!
Ondaka yitito yolondaka vio Helasi, yokuti iota, ya lisetahãla londaka yo Heveru yokuti (iode). Omo okuti Ocihandeleko ca Mose ca sonehiwa kuenda ca pitiyiwa kelimi lio Heveru, citava okuti Yesu wa kala oku tukula ondaka yo Heveru.
O Tetragrama okuti onduko ya Suku, Yehova, ya sonehiwa kelimi lio Heveru, yi tangiwa oku upisa konẽle yondio toke kepĩli
