Ovangelo​—Anga hẽ va Pondola Oku ku Kuatisa?

Vocalumingu cimue kekumbi, manji Kenneth kuenda Filomena okuti va kala volupale luo Curaçao, va ka nyulile ohueli yimue va enda oku longisa Embimbiliya.

Manji Kenneth wa lombolola hati: “Eci tua pitĩla tua sanga okuti onjo ya yika kuenda ekãlu ka lia kaleko. Pole tua sima oku telefonalela kukãi waye.”

Ukãi waco wa tambulula kuenje wa lombolola okuti ulume waye wa enda kupange. Noke, eye wa limbuka okuti manji Kenneth la Filomena va kasi posamua kuenda eye wa ikula epito kuenje wa va laleka oco va iñile.

Eci va iñila va limbuka okuti ukãi waco wa kala oku lila. Noke eci manji Kenneth a fetika elilongiso Liembimbiliya lohutililo, ukãi waco wa fetika oku lila vali. Kuenje lutate walua, manji Kenneth la Filomena vo pula esunga lieci a kala oku lila.

Ukãi waco wa va lomboluila okuti wa yonguile oku liponda keteke liaco kekumbi kuenda wa kala oku sonehela ukanda umue ulume waye, kuenje eci manji Kenneth o telefonalela wa liwekapo oku soneha. Eye wa va sapuila okuti wa kala oku liyaka lesumuo lialua kuenje oco vo lembeleke va tanga laye ovolandu amue Embimbiliya. Evetiyo a tambula lia popela omuenyo waye.

Manji Kenneth wa popia hati: “Tua eca olopandu ku Yehova poku tu vetiya oku kuatisa ukãi una wa kala oku liyaka lesumuo, capiãla enene poku tu songuila lekuatiso liungelo umue ale lespiritu sandu oco tu u telefonalele!”a

Anga hẽ manji Kenneth kuenda Filomena va kuata esunga lioku tava okuti Suku eye wa va songuila lekuatiso liungelo umue ale espiritu sandu? Ale otembo manji Kenneth a telefonala ya likuata lika locitangi caco?

Ka tu pondola oku popia okuti oco. Pole, tua kũlĩha okuti Suku o vetiya ovangelo vaye oco a kuatise omanu oku kuata ukamba laye. Embimbiliya li lombolola okuti Suku wa tuma ungelo umue oco a songuile ukundi Ukristão Filipu oco a kuatise kalei umue u Etiopia wa kala oku sandiliya oku kuata elomboloko Liovisonehua.—Ovil. 8:26-31.

Atavo alua a siata oku sandeka uhembi watiamẽla koviluvo viespiritu okuti, vamue va tukuiwa ndoviluvo viwa vi linga ocipango ca Suku ale va talavaya ndolondavululi viomanu. Omanu valua ka va tava lika okuti kuli ovangelo pole va tavavo okuti ovo va va kuatisa komuenyo wavo. Pole, omanu valua ka va tava okuti kuli ovangelo.

Anga hẽ kuli muẽle ovangelo? Nda kuli, va tunda pi? Cipi ocili catiamẽla kovangelo? Ovo va pondola ndati oku ku kuatisa ale oku ku yapuisa? Tu konomuisi ocili caco.