Kuli hẽ Ovangelo Vavĩ?

Ocili okuti kuli ovangelo vavĩ. Ovo va tunda pi? Ocili okuti Suku wa lulika ovangelo lelianjo lioku linõlela. Noke yotembo yimue eci Adama la Heva va lulikiwa, ungelo umue wa talavaya lãvi lelianjo liaye lioku nõla kuenda wa fetika esino palo posi. Eye wa vetiya Adama la Heva oku sinĩla Suku. (Efetikilo 3:1-7; Esituluilo 12:9) Embimbiliya ka li tukula onduko yungelo waco ale upange eye a enda oku linga kilu osimbu ka sinĩlile Suku. Pole, noke liesino, Embimbiliya li tukula ungelo waco okuti Satana, ci lomboloka “Unyali” kuenda Eliapu, ci lomboloka “Ukualombonde.”—Mateo 4:8-11.

Pole, esino liaco ka lia sulilile lika kotembo yaco. Koloneke via Noha, ovangelo vamue “va siapo ovitumãlo viavo” kilu. Ovo veya palo posi kuenda va lipongolola vatimba ositu oco va ambate omuenyo umue ka wa sungulukile loku livihĩsa okuti ka u likuata locipango ovo va lulikiwa.—Yuda 6; Efetikilo 6:1-4; 1 Petulu 3:19, 20.

Nye ca koka okuti angelo vaco va linga angelo vavĩ? Eci Suku a nena etande oco a yelise ongongo, ovo va lipongolola vatimba espiritu kuenda va tiukila kilu. Pole, Suku ka ecelele okuti angelo vaco vakuesino va tiukila ‘kovitumãlo viavo.’ Kuenje wa va kapa “vowelema wa piãla” u tukuiwa hati, Tartaru. (Yuda 6; 2 Petulu 2:4) Olondele viaco via vialiwa la Satana Eliapu, “soma yolondele” una wa siata oku “liluvikiya ndungelo wocinyi.”—Mateo 12:24; 2 Va Korindo 11:14.

Embimbiliya li longisa okuti Usoma wa Mesiya, uviali umue wokilu kuenda wa tumbikiwa kunyamo wo 1914.a Tunde kunyamo waco, Satana kumue lolondele viaye va tundisiwa kilu loku imbiwa palo posi. Ungangala kuenda evĩho liukahonga via siata voluali, ocindekaise cokuti ovo va tema kuenda va siata oku vetiya ovina viaco.—Esituluilo 12:9-12.

Omo liaco, evĩho kuenda ekambo liesunga, vi lekisa okuti esulilo liuviali waye li kasi ocipepi. Ndopo, ovangelo vavĩ ka va ka kuata vali unene. Eci Usoma wa Suku u ka viala vokuenda kueci ci soka 1.000 yanyamo, ovangelo vaco va ka kuata epuluvi lia sulako lioku yapuisa omanu. Kuenje ovo va ka kunduiwa otembo ka yi pui.—Mateo 25:41; Esituluilo 20:1-3, 7-10.