Ocili Catiamẽla Kolofa

SOKOLOLA okuti o kasi oku tala ovideo yimue ya tiamẽla komunu umue wa kemãla ale onjimbi yimue ove o sole. Ofilme yaco yi fetika loku lekisa utila waye, ndomo a fetika oku imba kuenda uloño akuete. Noke o mola okuti omunu waco o lekisiwa kovipito vialua, o linga ovongende kolonepa viosi violuali kuenda o linga omunu umue wa kemãla. Ka pa piti otembo yalua kuenje ku lekisiwa okuti, eye wa kuka kuenda wa fa.

Ovideo yaco hayuhembiko, pole ulandu womuenyo womunu umue wa kemãla okuti ka kasi vali lomuenyo. Nda okuti ovideo yaco ya lomboluile catiamẽla konjimbi yimue, onoño yimue, omunu umue ukuakuyoloka ale omunu umue wa kemãla, ulandu waco nda wa kala umuamue. Citava okuti omunu waco wa linga ovina vialua pole, ku simi hẽ okuti eye nda wa linga vali ovina vikuavo nda ka kukile ale oku fa?

Tu pondola oku yeva esumuo eci tu sokolola ovina viaco, pole, eci oco ci ka lipita letu vosi. (Ukundi 9:5) Ndaño okuti tua likolisilako, lomue o tẽla oku yuvula ovitangi vi yilila koku kuka kuenda koku fa. Tu pondola oku fa omo lioku vela ale omo liocilunga cimue. Ndomo ca lekisiwa Vembimbiliya, etu tu kasi ndombundu “yi molẽha okatembo kamue noke yi takata.”—Tiago 4:14.

Omanu valua ka va kuete ocimãho komuenyo kuenje va kuama ocisimĩlo cokuti “tu li, tu nyui, momo hẽla tu fa.” (1 Va Korindo 15:32) Pole, ku tava hẽ okuti omanu va kuete ocisimĩlo caco omo va kũlĩha okuti va laika oku fa kuenda ka va kuete elavoko lalimue liokovaso yoloneke? Cikale cilo ale kovaso yoloneke, capiãla enene nda o kasi oku liyaka locitangi cimue, citava okuti o lipula ndoco: ‘Anga hẽ omuenyo ulo owo lika?’ Pi o pondola oku sanga etambululo?

Omanu valua va lavoka okuti olonoño vi sanga etambululo. Olonoño kuenda olondotolo, via siata oku sandiliya ovina vi ecelela omunu oku kala otembo yalua komuenyo. Kuenda va kasi oku likolisilako oku talavaya oco omanu va kaile otembo yalua komuenyo. Pole, ndaño okuti olonoño vi likolisilako oku linga ovina viaco, lopo tu lipula ndoco: Momo lie tu kukila kuenda tu fila? Anga hẽ kuli elavoko liokuti olofa vi ka yuliwa? Ovipama vikuãimo vi ka lombolola atosi aco kuenda oku tambulula epulilo liokuti: Anga hẽ omuenyo ulo owo lika?