“Akristão va Sukila Oku Likutilila”
1. Nye tu sukila oku linga oco tu tẽlise upange wetu woku kunda?
1 Ka tu pondola oku tẽlisa upange woku kunda longusu yetu muẽle. Yehova eye o tu ĩha ongusu yoku linga upange waco. (Va Fil. 4:13) Eye wa siata oku tuma ovangelo vaye oco va tu kuatise oku sanga omanu va kasi ndolomeme. (Esit. 14:6, 7) Yehova eye wa siata oku kulisa ombuto tua kũla kuenda tua tapela. (1 Va Kor. 3:6, 9) Omo liaco, etu Tuakristão tu sukila oku kolela ku Isietu wo kilu poku likutilila!
2. Ovina vipi tu sukila oku tukula vohutililo?
2 Tu Sukila Oku Likutilila: Olonjanja viosi tu enda kupange woku kunda, tu sukila oku likutilila. (Va Efe. 6:18) Ovina vipi tu sukila oku tukula vohutililo? Tu sukila oku likutilila oco tu kuate ovisimĩlo via sunguluka locikanjo cetu, kuenda oku kuata utõi. (Ovil. 4:29) Tu pinga ku Yehova okuti o tu songuila komanu vakuavitima via sunguluka oco tu va longise Embimbiliya. Nda omunu tua sanga wa linga epulilo limue tu sukila oku linga ohutililo yonimbu ku Yehova, oco a tu kuatise oku eca etambululo lia sunguluka. (Neh. 2:4) Tu sukilavo oku pinga olondunge ku Yehova oco a tu kuatise oku pitisa kovaso upange woku kunda. (Tia. 1:5) Yehova o sanjuka calua eci tu kongela volohutililo vietu olondaka violopandu omo liesumũlũho lioku kala olondingupange viaye.—Va Kol. 3:15.
3. Oku likutililako vakuetu ci kuatisa ndati oku amisako lupange woku kunda?
3 Tu Likutililiko Vakuetu: Tu sukila oku ‘likutilililako vakuetu.’ Nda citava tu va tukula kolonduko. (Tia. 5:16; Ovil. 12:5) Anga hẽ ekambo liuhayele li ku tateka oku pesila otembo yalua kupange woku kunda? Citava okuti o likutilililako vamanji vana va kuete uhayele. Yuvula ovisimĩlo viokuti olohutililo viove ka vi kuatisa vakuene! Ca sungulukavo oku likutililako olombiali, okuti vi eca elianjo liupange woku kunda, oco vamanjetu va kale “lomuenyo wonjuka haiwo we yuka ombembua.”—1 Tim. 2:1, 2.
4. Momo lie, tu sukilila oku kuata ocituwa coku likutilila?
4 Ka tu pondola oku kunda olondaka viwa voluali luosi longusu yetu. Nda tua kuata ‘ocituwa coku likutilila,’ tu ka tẽlisa upange waco lekuatiso lia Yehova.—Va Rom. 12:12.