Lekisa Utate Osimbu o Kasi Kupange Woku Kunda
1. Momo lie ci kuetele esilivilo oku lekisa ‘utate’ kupange woku kunda?
1 “Ndolomeme pokati kolombinji,” afendeli va Suku va kasi oku kundila “pokati kocitumbulukila cilo cevĩho.” (Mat. 10:16; Va Fil. 2:15) Asapulo uyaki pokati komanu, ungangala, omanu va ambatiwa utiku, vi lekisa okuti omanu vãvi va kasi oku ‘amamako oku linga eci cĩvi.’ (2 Tim. 3:13) Ovisonehua vipi vi tu kuatisa oku lekisa ‘utate’ eci tu kasi kupange woku kunda?—Mat. 10:16.
2. Kapuluvi api tu sukila oku lekisa olondunge vioku tunda vocikanjo, oco tu ka kundile kocitumãlo cikuavo?
2 Lekisa Olondunge: Elivulu Liolosapo 22:3 li lekisa okuti oku ‘lisalamisa kũvi’ oco olondunge. Lavulula! Olonjanja vimue kolonepa kuna kua koka, ekalo lialio li pondola oku pongoloka. Ove pamue o pondola oku mola evokiyo liolosipayu ale omanu va liongolola volokololo. Citava okuti omunu umue ukuacisola o ku lungula. Nda wa lunguiwa ku ka cilue, lekisa olondunge poku tunda pocitumãlo caco loku enda kocitumãlo cikuavo.—Olosap. 17:14; Yoa. 8:59; 1 Va Tes. 4:11.
3. Onumbi yi sangiwa kelivulu Liukundi 4:9 yi kapiwako ndati kupange woku kunda?
3 Oku Talavayela Kumosi: Elivulu Liukundi 4:9 li popia hati: “Vavali kumuamue va velapo, umosi lika liaye o sule.” Kocitumãlo kuna ka kua kaile ohele yoku kundilako lika liove, anga toke cilo kua koka? Kovitumãlo vimue handi kua koka. Pole kovitumãlo vikuavo, ka kua kokele ku vamanji akãi ale amalẽhe oku kunda lika liavo konjo lanjo, ca piãla enene koñolosi. Ovolandu a lekisa okuti oku talavaya kavali oco ca velapo. (Uku. 4:10, 12) Lavulula vakuẽle vu kasi vocimunga cimuamue. Kuata ocituwa coku va sapuilako owola o tunda vocikanjo.
4. Tu talavaya ndati oco tu teyuile vosi vekongelo?
4 Akulu vekongelo va kuete ocikele coku eca olonumbi vi sukiliwa ndomo ci likuata lekalo lio pocitumãlo, momo ovo va ‘lavulula ovimuenyo vietu.’ (Va Hev. 13:17) Yehova o tu sumũlũisa lika nda tu lekisa esunguluko kuenda oku pokola kokuavo. (Mika 6:8; 1 Va Kor. 10:12) Afendeli vosi va Suku va sukila oku kuatisa koku eca uvangi vocikanjo cetu, pole ci lingiwe lutate walua.