Olonumbi Viohongele Yofeka
Elivala Lioku Fetika: Apito a ka yuluiwa kelivala 6 komẽle. Vokuenda kuoloneke vitatu, ovipama viohongele yofeka vi ka fetika kelivala 8:20. Eci usongui wovipama a tukula ovisikilo vioku fetika, vosi tu sukila oku tumãla kolomangu, oco tu yevelele ciwa ulandu wohongele. Votãlo la Casapalo, ohongele yi ka malusuiwa kelivala 15:55, pole, Calumingu yi ka malusuiwa kelivala 14:45.
‘Oku Sivaya Yehova Lovisungo’: Afendeli va Suku kosimbu va enda oku sivaya Yehova lovisungo, kuenda koloneke vilo ovisungo vi pangavo onepa kefendelo liocili. (Osa. 28:7) Olonepa viosi violohongele vietu viofeka vi fetika lovisikilo. Ovisikilo viaco via pongiyiwa oco vi tu kuatise oku kũlĩha loku fendela Yehova. Omo liaco, eci tu yeva esapulo liokuti ovisikilo vi fetika, ca sunguluka oku tumãla kolomangu vietu kuenda oku yevelela lutate ovisikilo. Poku ci linga ci lekisa okuti tua sanjukila alikolisilo va manji va linga poku pongiya ovisikilo viaco. Olonjanja vivali vunyamo vamanji alume kuenda akãi va linga ungende lolombongo viavo muele oku enda kofeka yo Patterson, Nova Yorke oco va ka ngalavale ovisikilo vi tu sanjuisa. Noke yoku yevelela lutate ovisikilo, vosi va pondola oku sivaya Yehova poku imba ovisungo Viusoma.
Oku Yeka Oviendelo: Kolohongele viofeka, ku sangiwa ocitumãlo cimue coku yeka oviendelo okuti, ka ci sukila oku feta. Pole, oviendelo vi ka kapiwa kulala loku kuama otembo omunu a pitĩla. Kuli ocitumãlo cimue coku kapa lika oviendelo via vana va lemãla. Omo okuti ovitumãlo vioku yeka akãlu vitito, vamanji vamue poku enda kohongele, va endela lika vekãlu limosi.
Oku Seleka Olomangu: Eci apito a ka yikuiwa koloneke viaco vitatu, ku ka ende lonjanga komangu o yongola oku tumãla, ndu okuti kua kapeleko vakuene veya kohongele yofeka. Ocituwa coku lieca olumue ci tu vetiya oku limbuka ovina viwa vakuetu va linga, loku eca uvangi wokuti, Tuakristão vocili, kuenda ci tu vetiya oku sivaya Suku. (Yoa. 13:34, 35; 1 Va Kor. 13:4, 5; 1 Pet. 2:12) Citava lika oku selekela olomangu vana wendeli vocendelo cimuamue, ale vana vu kasi lavo konjo yimuamue, kuenda vana o longisa Embimbiliya. Vamanji vana va kuka lava va vela, citava okuti ka va pondola oku tumãla kumue lepata liavo. Omo liaco, tu pinga okuti, vu va sokiyila olomangu viavo, kuenda vana va kasi oku va tata.
Uwalo wa Sunguluka: Vokuenda kuohongele yofeka tu sukila oku wala uwalo umue wa sunguluka, okuti ka u situlula ovituwa via siata voluali. (1 Tim. 2:9) Poku iñila loku tunda kowotele, lokelivala lionanya kuenda noke liovipama, tu yongola oku yuvula oku liposuisa lonjila yimue ka ya sungulukile. Oku wala uwalo umue wa sunguluka poku enda kohongele yofeka ci ka tu kuatisa oku kundila omanu tu sanga. Oku liposuisa kuetu kuenda ovituwa viwa tu lekisa poku enda kolohongele yofeka vi laika oku lingiwa, ka ci ka kuatisa lika omanu oku tava kesapulo Liembimbiliya li nena epopelo, pole, ci ka sanjuisavo Yehova.—Sof. 3:17.
Oku lekisa ovituwa viwa poku talavaya Lolomakina vi Eca Ovileñi: Tu lekisa ovituwa viwa vokuenda kuohongele poku tepulula ovileñi viotelefone yetu ale ovina vikuavo vi eca ovileñi oco ka tu ka tateki vakuetu oku yevelela. Poku upa olofoto, oku ngalavala olovideo,oku talavaya lolotablet ale ocina cikuavo ceca ocileñi tu sukila oku lekisa esumbilo kuvakuetu oco ka tu ka va tateke oku yevelela. Tu lekisavo ovituwa viwa poku yuvula oku tuma asapulo vokuenda kuohongele.
Onanya: Ambata okulia kuove oco ku ka tunde pocitumãlo cohongele oku ka landa okulia kelivala lionanya. Ku ka ambate ekualu lina okuti ka li iñila vemehi liomangu. Ka ca sungulukile oku nena ekualu linene lioku ambata okulia, kuenda olokopo, lovikuata vina vi tetuka lonjanga.
Olombanjaile: Tu lekisa olopandu keliangiliyo lia lingiwa poku eca olombanjaile vietu kohongele yofeka, oco vi kuatise kupange woku kunda u kasi oku lingiwa voluali luosi. Nda umue wa eca ombanjaile yopapelo yoku tambula olombongo kombango, ku sonehiwe hati, ya loña ko “Associac̗ão das Testemunhas de Jeová.”
Ovihemba: Nda wa tambula ovihemba vimue kosipitali, ciwa oku ambata evi vi tẽla, momo kocitumãlo cohongele ka ku ka kala ovihemba viosi. Olosilinga, lolonguya via vana va kuete uveyi wodiabete ka citava oku vi kapa vekualu liovinene pocitumãlo cohongele ale kowotele.
Olosapato: Unyamo lunyamo kua siata oku kala omanu valua va li lemẽha omo liolosapato. Omo liaco, wala olosapato via sunguluka, okuti ca leluka oku liatela lavio posi, ndaño pana pa sielena.
Otuakãlu Tuoku Ambata Oloñaña: Otuakãlu tuoku ambatela oloñaña, ka citava okuti, tu kapiwa apa o ka tumãla kohongele yofeka. Citava lika oku ambata uhamba woloñaña okuti wecelela oku u kapa ponele yomangu yolonjali.
Ulela Welemba Liwa: Olohongele vialua viofeka via siata oku lingiwila vocitumãlo cimue okuti, ka mu piti ofela yalua. Omo liaco, ciwa okuti, poku liwaveka ulela u kuete elemba liwa, tu likapa lika utito oco ka u ka pange lãvi vamanji vana va kuete esuka lovovei akuavo.—1 Va Kor. 10:24.
Oloformulariu (S-43) Queira Visitar: Vo formulariu losapi hati, Queira Visitar, mu sonehiwe olonumbi viatiamẽla komanu vana va lekisa onjongole eci tua va kundila kepuluvi liohongele yofeka. Akundi va ambate kohongele o formulariu yimosi ale vivali. Noke yoku soneha vo formulariu yaco olonumbi vi sukiliwa, citava oku yeca kukulu wekongelo usonehi.
Upange Woku Lieca Olumue: Nda umue o yongola oku lieca olumue, citava oku sapela la vamanji va talavaya Voseketa Yupange Woku Lieca Olumue kohongele yofeka. Amalẽhe vana va kuete 16 kanyamo, va pondolavo oku ci linga, poku kuama olonjali viavo, ale omunu ukuavo ukulu okuti, wa taviwa lolonjali viavo.
Ohongele Yofeka Kelimi Lioku Ilaika Lio Vongola: Ku kasi oku sokiyiwa ohongele yofeka kelimi lioku ilaika lia mulo Vongola.