EKALO LIAKRISTÃO

Ocipama Cokaliye Cohongele yi Lingiwa Vokati Kosemana

Oku upisa kosãi ya Susu 2018, vohongele yi lingiwa vokati kosemana, mu ka kongela atosi elilongiso kuenda ovipama vo internet vio Tradução do Novo Mundo da Bíblia Sagrada (nwtsty) yelilongiso, ndaño okuti Embimbiliya liaco handi ka lia sandekiwile kelimi liove. Kolela okuti onepa eyi yi ka ku kuatisa calua poku pongiya olohongele. Ocina ca velapo ceci okuti, ci ku kuatisa oku kuata ukamba la Isietu ukuacisola, Yehova!

ATOSI ELILONGISO

Atosi elilongiso a lekisa ovituwa, ofeka kuenda onjila ya kuamiwa poku soneha ovinimbu Viembimbiliya.

Mateo 12:20

Ondielo yi tuima: Kosimbu ondielo ya kala ombia yimue yitito yotuma mua kapiwa ulela. Ocinyaña cimue ci taima ci pũela ulela oco ondielo yi amameko oku taima. Kelimi lio Helasi ondaka “Ondielo yi tuima,” yi tiamisiwila kondielo yimue yi tuima momo handi yi kuete ondalu pole ondalu yaco yi kasi loku ima kamue kamue. Ocitumasuku ci sangiwa kelivulu lia Isaya 42:3, ci popia ovina viatiamẽla kohenda ya Yesu poku lekisa okuti, eye o ka kuatisa ambombe kuenda vana va talisiwa ohali oco va amamako oku kuata elavoko.

Mateo 26:13

Ocili: Ondaka a·menʹ kelimi lio Helasi, yopiwa kondaka a·men kelimi lio Heveru yi lombolola okuti, “ci lingiwe” ale “ocili muẽle.” Yesu wa tukula olonjanja vialua ondaka yaco oco a tõlise ondaka yimue, ohuminyo yimue ale ocitumasuku cimue loku lekisa okuti cocili kuenda ca koleliwa. Olondaka via Yesu viokuti “ocili” ale amene ovio lika vi sangiwa vovisonehua. Eci ku pituluiwa olondaka viokuti (a·menʹ a·menʹ) ndomo ca lekisiwa Vevanjeliu lia Yoano, ondaka ya Yesu ya pongoluiwa okuti “Ocili.”—Yoano 1:51.

O MÍDIA

Alitalatu, oviluvialuvia kuenda olovideo ka vi tundi ocileñi kuenda ovina vikuavo vi situlula ovolandu a sangiwa Vembimbiliya.

Ko Betefage, Komunda yo Olivera kuenda ko Yerusalãi

Ovideo eyi yakukutu amue, yi lekisa onjila yenda ko Yerusalãi oku u pisa kutundilo, vimbo limue okuti koloneke vilo o Tur, oku loña ko Betefage onepa yimue ya lepapo vali Yomunda yo Olivera. O Betánia yi sangiwa kutundilo wo Betefage ocipepi Lomunda yo Olivera. Eci Yesu kumue lolondonge viaye va enda oku enda ko Yerusalãi, va enda oku lala ko Betánia, okuti cilo yi tukuiwa hati imbo lio Azariyeh (El ʽEizariya), okuti kelimi lio Arábe onduko yaco yi lomboloka “Ocitumãlo ca Lasaru.” Yesu wa enda oku sikĩla konjo ya Marta, Maria kuenda Lasaru. (Mateo 21:17; Marko 11:11; Luka 21:37; Yoano 11:1) Eci a enda oku tiukila konjo yaye ko Yerusalãi, Yesu wa sukilile oku pita vonjila yimuamue ya lekisiwa vovideo. Keteke 9 kosãi ya Nisana, kunyamo 33 K.K., eci Yesu a endela kocimbulu oku tunda Komunda yo Oliveira oku loña ko Yerusalãi, eye wa pita vetapalo li tunda ko Betefage oco a ende ko Yerusalãi.

Etapalo li tunda ko Betánia li loña ko Betefage
Ko Betefage
Komunda yo Oliveira
Kidron Valley
Onembele Komunda

Ekepa Limue Liocisendemahi

Elitalatu eli li lekisa ekepa limue liocisendemahi lia kapiwa kutale umue u kuete 11,5 kolosentimetulu. Ekepa liaco, lia sangiwa kunyamo 1968 osimbu va kala oku fẽla konano yo Yerusalãi okuti lia lembikiwa kotembo ya va Roma. Olio lia eca uvangi ku vakuakufẽla ovina viosimbu okuti utale waco wa lisoka lowo va enda oku valela lawo omanu kuti. Utale waco wa lisoka lolopeleko vina va valela lavio Yesu kuti. Ekepa liaco lia sangiwa vocikasia cimue ca tungiwa lewe okuti omo va enda oku seleka akepa omunu wa fa osimbu. Eci ci lekisa okuti omunu wa pondiwila kuti, citava okuti o kendiwa.—Mat. 27:35.