Ove hẽ o Lete Atambululo Olohutililo Viove?

Vembimbiliya muli ovolandu alua olohutililo via tambuluiwa la Yehova. Eci afendeli va Yehova Suku va limbuka okuti, eye wa tambulula olohutililo via tiamẽla kovitangi viavo kuenda ndomo a va kuatisa, ekolelo liavo lia pamisiwa calua. Omo liaco, ci kuete esilivilo kokuetu oku tukula vohutililo ocitangi cetu kuenda oku sanda oku limbuka etambululo lia Yehova. Ivaluka okuti, pamue etambululo liaye li pondola oku litepa leci etu tua pinga. (2Ko 12:7-9; Efs 3:20) Nye Yehova a pondola oku eca poku tambulula apingilo etu?

• Oco tu tẽle oku liyaka lovitangi, eye o tu pamisa ketimba, kovisimĩlo ale konepa yespiritu. —Flp 4:13

• Olondunge vioku nõla onjila yiwa.—Tia 1:5

• Onjongole kuenda ongusu yoku linga ocina cimue.—Flp 2:13

• Oku tula utima nda kuli cimue ci tu sakalaisa.—Flp 4:6, 7

• Vakuetu va pondola oku tu kuatisa lovina tu sukila ale oku tu lembeleka.—1Yo 3:17, 18

• Ekuatiso lia vana va tu lombelako.—Ovl 12:5, 11

TALA OVIDEO LOSAPI, YEHOVA “UKUAKUYEVA OHUTILILO,” KUENDA TAMBULULA APULILO A KUÃIMO:

• Ulandu wa manji Shimizu u tu pamisa ndati nda ka tu tẽla oku linga ovina vialua omo liocitangi coku vela?

• Tu setukula ndati ongangu ya manji Shimizu?