Apulilo A Lingiwa La Vakuakutanga

Utate upi Akristão va sukila oku kuata poku talavaya lovimalẽho vioku tuma kuenda oku tambula asapulo?

Akristão vamue va talavaya lovimalẽho viokaliye vio Internet oco va sapele lepata liavo kuenda vamanji vakuavo. Pole, Ukristão ukualondunge o kapako onumbi yokuti: “Omunu wa lunguka o mola ũvi kuenje u yepa, puãi ava va kamba olondunge va enda ño kuenje va yambuka.”—Olosap. 27:12.

Tua kũlĩha okuti Yehova o yongola oku tu teyuila. Omo liaco ka tu yongola oku kuata ukamba la vana va koka olonepele, vana va tundisiwa vekongelo, ale vana va pengisa elongiso. (Va Rom. 16:17; 1 Va Kor. 5:11; 2 Yoa. 10, 11) Vamue va siata oku likongela letu kolohongele, pamue ka va pokola kolonumbi Viembimbiliya. (2 Tim. 2:20, 21) Kuenje poku nõla akamba vetu, tu sukila oku kapako ovina evi. Ci tĩla calua oku nõla ciwa akamba nda okuti tu sapela lika lavo pocakati covimalẽho vioku tuma asapulo.

Ci kuete esilivilo oku kuata utate koku nõla akamba vawa, ca piãla enene nda ocimunga caco cinene. Akristão vamue va siata oku likongela lovimunga vinene, ka va siatele oku kuata onima yiwa. Ndamupi manji umue a pondola oku kuata utate nda wa likongela kocimunga cimue cinene cakamba? Ka ci tẽliwa oku kũlĩha nda okuti vosi yavo vakuacili kuenda va kuete ekolelo lia pama. Olosamo 26:4 hati: “Si tumayala lolohembi. Oku enda la vakuelimbi si kuatako.” Eci ci lomboloka okuti tu sukila lika oku tuma asapulo ku vana tua kũlĩha ciwa.

Ndaño okuti ocimunga caco cakamba citito, Ukristão o sukila oku kuata utate konjila ndomo a pesela otembo koku tuma asapulo kuenda ovina omanu vaco va kasi oku sapela. Ka tu kisikiwa oku tambulula asapulo aco, ndaño okuti ovo vambata otembo yalua poku ci soneha. Paulu wa lungula Timoteo catiamẽla komanu “vakualombonde, haivo va litenga vovitangi viamãle.” (1 Tim. 5:13) Koloneke vilo, ci lelukavo oku linga ovina vimuamue pocakati covimalẽho vio Internet.

Ukristão wa pama konepa yespiritu ka vangula, ale oku yevelela ovina ka via sungulukile pamue oku situlula ovina viopokolika viatiamele Kukristão ukuavo. (Osa. 15:3; Olosap. 20:19) Eye o yuvulavo oku pitulula, ale oku yevelela ovolandu ana okuti a ociliko. (Va Efe. 4:25) Etu tu kuete ovina vialua viatiamẽla Kembimbiliya kuenda ovolandu tu pondola oku kolela a sangiwa vo jw.org kuenda osãi losãi tu tambula ovipama vio JW Broadcasting.^®

Akristão vamue va siata oku talavaya lasapulo vo Internet oco va landise, oku landa kuenda oku pilisa ovina vimue vioku landisa, ale oku eca upange. Ovina viaco viatiamẽla kolomĩlu kuenda ka vi pangi onepa kefendelo lia Yehova. Akristão vana va yongola oku yuvula “ocisola coku sola olombongo,” ka va lingi asapulo oku vetiya vamanji oku panga onepa kolomĩlu vivo.—Va Hev. 13:5.

Anga hẽ tu pondola oku talavaya lovimalẽho vioku tuma asapulo oco tu pinge olombongo vioku kuatisa vamanji va sukila ekuatiso, ale vana va pita lovilunga? Etu tu sole vamanji, tua va kapako kuenda tu kuatisa vana va sukila ekuatiso loku va pamisa. (Tia. 2:15, 16) Pole, oku seteka oku ci linga vasapulo okuti mu kongela ocimunga cinene cakamba, ci pondola oku tateka esokiyo lia lingiwa lo filiale, ale ekongelo. (1 Tim. 5:3, 4, 9, 10, 16) Lomue pokati ketu o yongola oku lilekisa lonjila yimue yi likasi okuti wa nõliwa oco a kuatise vamanjetu.

Etu tu yongola oku linga ovina vi eca ulamba ku Suku. (1 Va Kor. 10:31) Omo liaco, onjanja yosi o talavaya locimalẽho coku tuma esapulo, ale ocina cikuavo vo Internet, kũlĩhĩsa ohele iyililako kuenda kuata utate.