Apulilo a Lingiwa la Vakuakutanga

Ocisonehua ci sangiwa kukanda 2 Va Tesalonike 3:14, ci lombolola eci catiamẽla koku ‘kũlĩhĩsa’ omanu vamue. Helie o pondola oku ci linga? Akulu vekongelo, ale omunu lomunu vekongelo?

Upostolo Paulu wa sonehela Akristão vo ko Tesalonike poku popia hati: “Nda umue ka pokola kondaka yetu pocakati cukanda ulo, kũlĩhĩsi omunu waco.” (2 Va Tes. 3:14) Kosimbu tua popaile okuti, onumbi eyi yi tiamisiwila kakulu vekongelo. Nda okuti umue amamako oku sinĩla alungulo Embimbiliya ndaño noke yoku tambula alungulo olonjanja vialua, akulu vekongelo pamue va nõlapo oku linga ohundo yimue vekongelo liaco. Oku upisa opo, akundi va yuvula oku kala kala laye kuenje va kala laye lika kolohongele kuenda kupange woku kunda.

Pole ci sukila oku linga apongoloko. Cilo tu kuete elomboloko lielungulo Paulu a eca liokuti, Ukristão Lukristão eye muẽle o nõla onjila a kuama. Omo liaco, ka kuli esunga liakulu vekongelo oku linga ohundo yelungulo. Momo lie kua lingiwila epongoloko liaco? Kũlĩhĩsa ulandu waco kelungulo Paulu a eca.

Paulu wa popia okuti, omanu vamue vekongelo liaco va kala oku lekisa ‘esino.’ Paulu wa ecele elungulo kokuavo lia kunamẽla Vembimbiliya, pole, ovo ka va yonguile oku pokola. Vokuenda kuepasu limue lia pita, eye wa eca elungulo liokuti: “Nda umue ka yongola oku talavaya, ka ka lie.” Pole, vamue handi va enda oku likala oku talavaya oco va litekule, ndaño okuti va kuatele epondolo lioku ci linga. Handi vali, ovo va enda oku litenga vovitangi via vakuavo. Akristão va ponduile oku tata ndati omanu vaco va “sina?”—2 Va Tes. 3:6, 10-12.

Paulu wa popia hati: “Kũlĩhĩsi omunu waco.” Ondaka yo Helasi yeca ocisimĩlo coku kũlĩhĩsa omunu waco kuenda oku kuata utate, oco ka tu ka yapuisiwe laye. Paulu wa suñamisa elungulo liaco kekongelo liosi okuti, kakulu vekongelo lika hakoko. (2 Va Tes. 1:1; 3:6) Omo liaco, Ukristão Lukristão wa limbuka manji umue okuti wa sinila elungulo Liondaka ya Suku wa sukilile, loku nõlapo oku siapo oku ‘kuata ukamba’ lomunu waco wa sina.

Eci ci lomboloka hẽ okuti, omunu waco wa sukilile oku tatiwa nda umue wa tundisiwa vekongelo? Sio, momo Paulu wamisako hati: “Amamiko oku u lungula nda manji.” Kuenje Ukristão Lukristão wa ponduile oku kũlĩhĩsa omunu waco kolohongele kuenda kupange woku kunda, pole, ka ponduile oku pita laye otembo kovitalukilo. Momo lie? Paulu wa popia hati: “Oco a kutisiwe osõi.” Eci tu siapo oku livala ukamba la manji yaco, eye pamue o yeva osõi omo lieci a kasi oku linga kuenda o pondola oku pongolola ocituwa caye.—2 Va Tes. 3:14, 15.

Akristão va pondola oku kũlĩha ndati vepuluvi va sukila oku kũlĩhĩsa omunu umue? Tete tu sukila ku kolela okuti ovituwa viomunu waco viatiamẽla ‘kesino’ ndomo Paulu a ci soneha. Eye ka kaile oku tukula omanu vana vakuavisimĩlo via litepa levi vietu, catiamẽla kowanji wutima, ale kolonjongole viomunu. Handi vali, eye ka kaile oku tukula omanu vana va tu sumuisa. Pole, Paulu wa kala oku tukula omanu vana va nõlapo oku sinĩla locipango alungulo Ondaka ya Suku.

Koloneke vilo, nda tua limbuka okuti manji umue o lekisa ocituwa coku sina kuenda amamako ku sinĩla elungulo Liondaka ya Suku,a omunu lomunu eye o ka nõlapo nda o yuvula oku kala kala lomunu waco kovitalukilo vimue. Omo okuti omunu lomunu eye o nõla onjila yaco, ka tu sukila oku sapuilako omanu vakuavo, te lika kepata lietu muẽle. Pole, tu pondola ku sapela lika lomunu waco kolohongele kuenda kupange woku kunda. Eci eye a pongolola ovituwa viaye kuenda ovilinga, tu kuata vali ukamba laye.