Poku Lilongisa Likolisilako Oku Limbuka Ovina Viokaliye

Eci tu lipongiyila oku lilongisa tu sukila oku lipula ndoco: ‘Nye ndi yongola oku lilongisa?’ Pole, tu sukila oku ivaluka okuti ndaño tua lilongisa ale ovina vimue, ka ci lomboloka okuti ka kuli vali ovina viokaliye Yehova a yongola okuti tu vi lilongisa. Oco hẽ tu pondola oku limbuka ndati ovina viokaliye?

Likutilila oku pinga olondunge. Pinga ku Yehova oco a ku kuatise oku limbuka eci eye a yongola okuti o ci kũlĩha cilo. (Tia. 1:5) Ku ka sanjukile lika ovina wa kũlĩha ale.—Olosap. 3:5, 6.

Ecelela okuti unene wondaka ya Suku yi linga onepa komuenyo wove. “Momo ondaka ya Suku yi kasi lomuenyo.” (Va Hev. 4:12) Omo liaco, olonjanja viosi o tanga Embimbiliya, olio li ka ku longisa ocina cokaliye kuenda oku ku kuatisa volonjila viñi viñi, pole, ci lingiwa lika nda wa likolisilako oku limbuka ovina viokaliye Yehova a kasi oku ku longisa.

Lekisa olopandu kovina viosi Yehova a kasi oku longisa. Okulia kuespiritu Yehova a siata oku tu ĩha ku sokisiwa ‘locipito cimue cokulia ku pepa.’ (Isa. 25:6) Omo liaco, ku ka yuvule oku tanga olonepa vina ove o sima okuti ku ka vi sola oku vi tanga!