Onduko Yimue yi Kasi Vembimbiliya ya Sangiwa Kilu Liesanga Limue Liosimbu

Kunyamo wo 2012, vakuakulembulula ovina viosimbu, va sanga ovinimbu vimue vitito viesanga vi kuete ci soka 3.000 kanyamo. Vakuakukonumuisa va komõha calua. Momo lie? Ovo ka va komohẽle omo liovimuanyũila viesanga pole ovo va komoha omo liolondaka via sonehiwa kovimuanyũila viesanga liaco.

Eci vakuakulembulula va kongela ovinimbu viosi, va tẽla oku tanga olondaka via sonehiwa la va Kanana vesanga liaco. Vesanga liaco mua sonehiwa hati: “Esibaale Ben Beda,” ci lomboloka “Esibaale, omõla a Beda.” Eyi oyo onjanja yatete vakuakulembulula ovina viosimbu via sonehiwa kocikuata cimue cosimbu.

Omunu ukuavo o tukuiwa hati, Esibaale wa tukuiwa Vembimbiliya. Eye wa kala umue pokati komãla va Soma Saulu. (1 Asapulo 8:33; 9:39) Ulongisi Yosef Garfinkel okuti, umue pokati kalume va sanga esanga liaco, wa popia hati: “Ci komohĩsa oku limbuka okuti onduko Esibaale yi sangiwa Vembimbiliya kuenda cilo yi sangiwavo vekonomuiso lia vakuakukonomuisa ovina via lembikiwa va linga, vokuenda kuviali wa Soma Daviti.” Evi vimue pokati kovolandu a lekisa okuti uloño woku konomuisa ovina via lembikiwa posi, u likuata Lembimbiliya!

Vembimbiliya omõla a Saulu Esibaale o tukuiwavo hati, Isivosiete. (2 Samuele 2:10) Momo lie “baale” a piñanyiwa la “Isivosiete”? Vakuakukonomuisa va lombolola okuti, usonhi welivulu liavali lia Samuele wa yuvuile oku tukula onduko Esibaale momo onduko yaco ya enda oku ivaluisa va Isareli baale okuti, o suku yimue va Kanana va enda oku fendela. Pole, Vembimbiliya elivulu liatete Liasapulo tu pondola oku sangamo onduko ya Esibaale.