Wa Ci Kũli̇̃ha?

Momo lie Yesu a tukuila vana va kala oku landisa ovinyama vonembele ko Yerusalãi okuti ‘ovimunu?’

VEVANGELIU lia Mateo tu tangamo ndoco: “Yesu wa iñila vonembele yu wa tundisa vosi vakuakulandisa la vakuakulanda vonembele kuenje wa kupula olomesa via vakuakutolokala olombongo kuenda olomangu via vakuakulandisa olopomba. Wa va sapuila hati: “Ca sonehiwa citi, ‘Onjo yange yi tukuiwa onjo yohutililo,’ pole, ene wa yi lingisi ocilala covimunu.””​—Mateo 21:12, 13.

Ovolandu a lekisa okuti vakuakulandisa vonembele, va enda oku tata vakuakulanda lonjila yimue ka ya sungulukile poku va landisa ovina londando yimue ya tĩla. Olopomba via enda oku landisiwa londando yimue yitito okuti, ca enda oku ecelela olohukũi oku landa olopomba oco va vi lumbe. Omo liaco, ovisonehua viosimbu via va Yudea via lekisa okuti, kocita catete, omunu wa sukilile oku feta ondenariu yimosi yulu oco a lande olopomba vivali. Pole, oco onalavayi yi fetiwe olombongo viaco wa sukilile oku pita eci ci panda 25 koloneke. Olopomba via tĩlile calua okuti olohukũi ka via kuatele epondolo lioku vi landa. (Ovisila 1:14; 5:7; 12:6-8) Ulongisi umue o tukuiwa hati, Simeone Gamaliele wa temẽle calua omo liovina viaco kuenje wa tuma oku tepulula etendelo liovilumba va Yudea va enda oku eca. Vonjanja yaco, ondando yolopomba vivali ya kala olondenariu vitito viulu.

Ndomo tua ci kũlĩhĩsa, vana va enda oku landisa vonembele va kala vakuacipululu kuenda va enda oku nyana vakuakulanda. Eli olio esunga lieci Yesu a va tukuila okuti va kala ‘ovimunu.’