Anga hẽ Ove wa Kũlĩha Otembo?

NDA o yongola oku kũlĩha elivala o kasi, nye o linga? Ove pamue o vanja kololosio yove. O limbuka okuti ekumbi vongunji lia pita ale 30 kakukutu. Nye nda wa sapuila kekamba limue nda lia ku pulisa hati, “Elivala lipi tu kasi?”

Ca tamba ño kocitumãlo o kasi. Pamue o popia hati, “Tu kasi kelivala 1:30, ale 13:30.” Kovitumãlo vimue pamue o popia hati, “Kua kamba akukutu 30 oco tu pitile kelivala lia vali.”

Omanu kosimbu va endaile oku tukula ndati otembo? Ovo va kuatavo olonjila vialua vioku ci popia. Ovisonehua vio Heveru vi tukula olondaka ndeci; “komele,” “ekumbi pongunji,” kutanya, kuenda “koñolosi.” (Efetikilo 8:11; 19:27; 43:16; Esinumuĩlo 28:29; 1 Olosoma 18:26) Pole, olonjanja vimue Embimbiliya li tukula elivala lia suapo.

Ko Isareli yosimbu, ca kala ocituwa oku kuata ondavululi, ca piãla enene kuteke. Va Isareli uteke va enda oku u tepa volonepa vitatu, ovo va enda oku ci tukula hati, ‘okulendela.’ (Osamo 63:6) Kelivulu Liolonganji 7:19, tu tangako eci catiamẽla “kefetikilo lioñolosi.” Pole, kotembo Yesu a citiwa, va Yudea uteke va enda oku u tepa volonepa vikuãla, va Helasi kuenda va Roma va ci lingilevo.

Avanjeliu a lombolola ondaka okulendela kuteke, olonjanja vialua. Ndeci, “kociteketeke,” Yesu wa endela kilu liovava oku loña vowato mua kala olondonge viaye. (Mateo 14:25) Yesu wa tukula olusapo lumue hati: “Nda muẽleanjo wa kũlĩhĩle elivala ocimunu ciya, eye nda wa lavulula kuenda nda ka ecelelele okuti onjo yaye yi pundiwa.”—Mateo 24:43.

Yesu wa tukula vosi vakuakulendela vakuãla eci a sapuila olondonge viaye, oco va lavulule momo ‘ka va kũlĩhĩle eteke muẽleanjo eya, nda iya luteke, nda vokati kuteke, ale kociteketeke, pamue komẽle.’ (Marko 13:35; etosi) Ulume watete ukuakulendela, “kuteke,” wa enda oku ci linga oku upisa koku iñila kuekumbi toke kowola yecea kuteke. Ulume wavali ukuakulendela, “vokati kuteke” wa enda oku ci linga oku upisa kowola yecea kuteke toke vokati kuteke. Ulume watatu ukuakulendela “kociteketeke,” ale “ceci ekondombolo li lila,” okuti oku upisa vokati kuteke toke kowola ya tatu komẽle. Citava okuti velivala liaco eci ekondombolo lia lila, oco Yesu a kuatiwa. (Marko 14:72) Ulume wakuãla ukuakulendela, “komẽle,” wa ci linga oku upisa kowola yatatu komẽle toke koku tunda kuekumbi.

Ndaño okuti kotembo yaco omanu ka va kuatele ololosio ndeci koloneke vietu, ovo va kuatele onjila yimue yoku tukula otembo.