Esapulo 66
Isevele wa Kala Onasoma Yimue Yĩvi
NOKE lioku fa kua Soma Yerevoama, olosoma viosi vio konano via enda loku viala apata ekũi a va Isareli, viosi via kala olongangala. Pokati kavo Soma Ahava eye wa kala ondingaĩvi ya piãla. Ove hẽ wa kũlĩha esunga liaco? Eye wa kala ondingaĩvi omo liukãi waye Isevele.
Isevele ka tiamẽlele kepata lia va Isareli. Pole, wa kala omõla a soma yo ko Sitono. Eye wa enda loku fendela Baale osuku yesanda. Handi vali, wa vetiyavo Ahava kuenda va Isareli oku fendela Baale. Isevele wa suvukile calua Yehova kuenda wa ponda ovaprofeto valua va Yehova. Ovaprofeto vakuavo va enda loku tilila kaleva oco va popele omuenyo wavo. Isevele wa kala okuti, nda oyongola oku tambula cimue komunu, wa enda oku ponda omunu waco.
Eteke limue Soma Ahava wa sumuile calua. Noke Isevele wo pula okuti: ‘Etaili nye wa sumuila?’
Ahava wa kumbulula hati: ‘Nda sumua omo lia Navote. Momo nda yonguile oku landa ocumbo caye cayuva. Pole eye wa ñumbulula hati: Siu ku ĩha ocumbo cange cayuva.’
Isevele wa popia laye hati: ‘Ku ka sumue. Ame ndu ku ĩha ocumbo caco.’
Noke Isevele wa soneha ovikanda. Ovikanda viaco wa vi tuma kakulu kuenda kasongui vofeka vana va tunga kumue la Navote. Vovikanda viaco wa sonehamo hati: ‘Tumbiki alume vamue vakuesanda kovaso omanu vosi. Alume vaco va imbe uvangi wokuti, Navote wa popela Suku etonãi kuenda soma. Noke tundi laye kosamua yimbo. U sosoli lovawe oco a fe.’
Eci Isevele a yeva okuti Navote wa fa, wa sapuila Ahava hati: ‘Kaliye kuende, ka tambule ocumbo caye cayuva.’ Ove hẽ ku tava okuti Isevele wa sesamẽlele oku yambuiwa omo lielinga liaco lĩvi?
Noke Yehova weya oku tuma Yehu oco a yambule Isevele. Eci Isevele a yeva okuti Yehu o kasi lokuiya, wa finisa ciwa ovaso aye kuenda oku seteka oku liposuisa. Pole eci Yehu a pitila wa mola Isevele ponjanela. Kuenje wa vilikiya alume konjo ya soma hati: ‘Wimbi posi!’ Alume vaco va pokola kondaka ya Yehu ndomo o cilete vociluvialuvia cilo. Ovo vo wimba posi kuenje wa fa. Eli olio lia kala esulilo lia Nasoma Isevele ondingaĩvi.
1 Olosoma 16:29-33; 18:1-4; 21:1-16; 2 Olosoma 9:30-37.