Esapulo 76

Oku Nyoliwa Kuo Yerusalãi

TUNDE eci Soma Nevukandesa a tuala amalẽhe vosi vakualondunge ko Bavulono, pa pitile ale ci soka ekũi kanyamo. Kaliye kũlĩhisa eci ci kasi loku pita! O Yerusalãi ya nyõliwa. Va Isareli vana va puluka kolofa, va kasi loku ambatiwa ndolomandekua ko Bavulono.

Ivaluka okuti ovina evi, ovio uprofeto wa Yehova a sapuilile va Isareli. Pole, ovo ka va pokuile kelungulo liaco. Kuenje va amamako oku fendela olosuku viesanda. Omo liaco, va sesamẽlele muẽle oku yambuiwa. Etu tua kũlĩha ovina evi momo, Esekiele uprofeto wa Suku wa tu sapuila ovina vĩvi va Isareli va lingaile.

Esekiele wa kala helie? Esekiele wa kala umue pokati kamalẽhe Soma Nevukandesa a tualele ko Bavulono. Otembo yaco pa kambele handi ekũi kanyamo koku nyõliwa kuo Yerusalãi. Daniele lakamba vaye vatatu Sadrake, Mesake kuenda Aved-Nego, va tualiwa ko Bavulono kotembo yimuamue.

Eci Esekiele a kala ko Bavulono, Yehova wo lekisa ovina vĩvi via kala loku lingiwila vonembele ko Yerusalãi. Yehova wo lekisila ovina viaco vocinjonde. Ndaño okuti otembo yaco Esekiele wa kala handi ko Bavulono, Yehova wo lekisa ovina viosi via kala loku lingiwila vonembele. Ovina Esekiele a mola, vi komõhisa calua!

Yehova wa sapuila Esekiele hati: ‘Tala ovina vĩvi omanu va kasi loku lingila vonembele. Tala ovimano ndomo via kapiwa ovisetahãi violonyoha lovinyama vikuavo. Kũlĩhisa ndomo va Isareli va kasi loku vi fendela!’ Esekiele eci a mola ovina viaco, wa vi soneha viosi.

Yehova wa pula Esekiele hati: ‘O lete eci akulu va Isareli va kasi loku linga vuyombeki? Kũlĩhisavo ovina viaco. Kuli eci ci soka akũi epanduvali kalume va talama oku fendela olosuku viesanda. Ovo va kasi loku popia hati, Yehova ka tu lete. Eye wa yanduluka ofeka.’

Noke Yehova wa lekisa ku Esekiele akãi va kala kombundi yonembele ya imba ovaso ko norte. Akãi vaco va tumãla loku fendela osuku yimue yesanda Tamusi. Kũlĩhisa ño alume ava pombundi yoku iñila vonembele ya Yehova! Alume vaco va kasi eci ci soka akũi avali kalume kalume vatãlo. Esekiele wa molavo alume vaco. Ovo va imba ovaso kutundilo kuenje va kasi loku fendela ekumbi!

Yehova wa popia hati: ‘Omanu ava ka va ndi sumbile. Ovo ka va siatele lika oku linga ovina vĩvi. Pole veya muẽle vonembele yange oku linga ovina viaco!’ Omo liaco, Yehova wa popia hati: ‘[Omanu vaco] va ka yeva unene wonyeño yange. Si va kuatela ohenda eci va nyõliwa.’

Eci pa pita anyamo atatu tunde eci Yehova a lekisa Esekiele ovina evi, va Isareli va fetika oku sinila Soma Nevukandesa. Noke soma Nevukandesa wa katuka oku liyaka lavo. Eci pa pita unyamo umosi lolosãi epandu, va Bavulono va kupula ovimbaka vio Yerusalãi. Kuenje va nyõla imbo liaco. Omanu valua va pondiwa, vakuavo va tualiwa kumandekua ko Bavulono.

Momo lie Yehova a ecelela ovina viaco oku pita la va Isareli? Yehova wa ecelela okuti ovina viaco vi li pita lavo momo ka va yevele kondaka yaye. Kuenda ka va pokuile kovihandeleko viaye. Ulandu owu u lekisa kokuetu esilivilo lioku pokola ku Suku olonjanja viosi.

Kefetikilo vofeka ya va Isareli mua siaile omanu vamue vatito. Kuenje Soma Nevukandesa wa nõla Gedaliya ulume umue u Yudea oco a kale usongui wavo. Pole, vamue va Isareli veya oku suvuka Gedaliya kuenje vo ponda. Omo liaco, omanu valua va fetika oku kuatela usumba va Bavulono. Ovo va kala loku sima okuti va Bavulono veya oku va ponda omo lielinga liaco lĩvi. Noke va vetiya Yeremiya oku enda kumue lavo poku tilila Kegito.

Ofeka ya va Isareli yeya oku siala upolokoso vokuenda kueci ci soka akũi epanduvali kanyamo. Pole, Yehova wa likuminyile okuti, noke yeci ci soka akũi epanduvali kanyamo, vofeka mu ka tunga vali omanu. Oco hẽ nye ca pita lomanu va Suku ko Bavulono kuna va tualiwa? Tu konomuisi ulandu waco.

2 Olosoma 25:​1-26; Yeremiya 29:10; Esekiele 1:​1-3; 8:​1-18.