Esapulo 82

Mordekai Kuenda Ester

TU SOKOLOLI konyima eci handi Esera ka endele ko Yerusalãi. Mordekai kuenda Ester va kala va Isareli vamue va velelepo kuviali wa Persia. Ester wa kala nasoma, kuenda epalume liaye Mordekai wa kala omunu wavali vusoma. Tu konomuisi ndomo ca pita.

Olonjali via Ester via fa eci handi eye a kala utito, kuenje Mordekai eye wo tekula. Ahasuero soma yoko Persia wa kuata onjo yelombe vombala ya Susana. Kuenda Mordekai wa kala umue pokati ka kuenje vaye. Eteke limue ukãi wa soma Wasiti ka pokuile kokuaye, kuenje Soma wa nõla ukãi umue ukuavo oco a kale nasoma. Ove wa kũlĩha ukãi soma a nõla? Eye wa ñola ufeko Ester wa posoka calua.

Ove hẽ o lete ulume u va kekamẽla ndeti? Eye okasi oku li tunula. Onduko yaye Hamana. Eye wa kala ulume umue wa kemãlele calua vofeka yo Persia. Hamana wa yonguile okuti Mordekai wa tumãla ndeti u kekamẽlavo. Pole, Mordekai ka tavele oku ci linga. Momo eye wa kũlĩhile okuti ka ca sungulukile oku kekamẽla omunu. Omo liaco, Hamana weya oku tema calua. Nye eye a linga?

Hamana wa sapula uhembi ku soma kueci catiamẽla ku va Isareli. Eye wa popia hati, ‘va Isareli omanu vamue vãvi ka va pokola kovihandeleko viove. Ovo va sesamẽla oku fa.’ Ahasuero ka kũlĩhile okuti ukãi waye Ester wa kalavo u Isareli. Kuenje eye wa yevelela Hamana, kuenda wa linga ocihandeleko cokuti eteke limue va Isareli vosi va pondiwa.

Eci Mordekai a yeva ocihandeleko eci, wa kala lusumba walua. Eye wa tuma oku sapula ku Ester hati: ‘Ove o kuete oku vangula la soma, kuenda oku u pinga oco a tu popele.’ Ocihandeleko co ko Persia ka ca tavale oku vangula la Soma nda ka ku lalekele. Pole, Ester wa vangula la Soma, ndaño okuti ka vo lalekele. Soma wo wilika ombueti yaye yulu, ci lekisa okuti eye ka pondiwa. Kuenje Ester wa laleka soma kuenda Hamana kondalelo yimue yavelapo. Soma wa pula ku Ester eci eye a yongola. Eye wa popia la soma okuti oko sapuila ño nda eye kuenda Hamana va tiukilile vali kondalelo yeteke likuavo.

Kondalelo yaco Ester wa popia la soma hati: ‘Ame lepata liange tuka pondiwa.’ Kuenje soma wa temẽle calua. Noke eye wa pula hati: ‘Helie o seteka oku ci linga?’

Ester wa popia hati: ‘Ulume, ondingãivi, hayu Hamana!’

Soma wa temẽle muẽle calua. Eye wa tuma oku ponda Hamana. Noke Soma wa tumbika Mordekai oco a kale omunu wa vali kuviali waye. Mordekai wa tumbika ocihandeleko cokaliye oco ci teyuile va Isareli eci va setekiwa oku pondiwa lovanyali vavo. Omo okuti Mordekai wa kala omunu umue wa velapo vofeka, omanu valua va kuatisa va Isareli. Kuenje va Isareli va yovuiwa kovanyali vavo.

Elivulu lia Ester 1-10.