Esapulo 90
Yesu wa Vangula Lukãi Pocisimo
YESU wa talama pocisimo vo Samaria oco a puyukepo. Olondonge viaye via enda volupale oku landa okulia. Ukãi o kasi ndeti loku vangula la Yesu weya oku tapa ovava. Yesu wa popia laye hati: ‘Nyiheko ovava oku nyua.’
Ukãi wa komõha calua. Wa kũlĩha eci a komõhela? Momo Yesu wa kala u Yudea, ukãi wa kala u Samaria. Va Yudea ka va solaile va Samaria. Kuenda ka va li vangowaile. Pole, Yesu wa solele omanu vosi. Kuenje wa popia lukãi hati: ‘Nda wa kũlĩhile u okasi oku ku pinga ovava oku nyua, ove nda wo pinga ovava omuenyo kuenje eye nda wa ku ĩha.’
Ukãi wa popia laye hati: ‘A Ñala ku kuete ociyenjo, kuenda ocisimo ca longa. Upa pi ovava aco omuenyo?’
Yesu wa popia laye hati: ‘Nda ove wanyua ovava a, o yeva vali enyona.’ ‘Pole, ovava ndu ku ĩha a eca komunu omuenyo ko pui.’
Ukãi wa popia laye hati: ‘A Ñala, nyiheko ovava aco! Oco si ka yeve vali enyona. Kuenda oco si keyaiye vali kulo oku tapa ovava.’
Ukãi wa sima okuti Yesu wa kala loku vangula catiamẽla kovava año. Pole, eye wa kala loku vangula eci catiamẽla kocili ca Suku kuenda ku Soma waye. Ocili caco ca soka ndovava omuenyo. Kuenda ovava aco a pondola oku eca komunu omuenyo ko pui.
Yesu wa popia lukãi hati: ‘Kuende ka vilikiye veyove kuenje tiuki.’
Ukãi wo kumbulula hati: ‘Si kuete veyange.’
Yesu wa popia laye hati: ‘Wa popia ciwa.’ ‘Momo wa kuata alume vatãlo, kuenje u o kasi laye cilo haveyoveko.’
Ukãi wa li salukako momo eci eye a popia ocili. Yesu wa kũlĩhile ndati ovina evi? Yesu wa ci kũlĩhile momo eye wa tumiwa la Suku. Kuenje Suku eye wo sapuila ulandu waco. Eci olondonge via Yesu via tiuka, via komõha omo eye a kala loku vangula lukãi u Samaria.
Nye tu lilongisila kulandu owu? Ulandu owu u tu lekisa okuti, Yesu wa solele omanu vakuakova osi. Etu tu kuete oku kuama ongangu yaye. Tu kuete oku yuvula oku sima okuti omanu vamue vãvi omo va kuekova lia li tepa leli lietu. Yesu o yongola okuti omanu vosi va kũlĩha ocili ci tuala komuenyo ko pui. Omo liaco, tu sukila oku kuatavo onjongole yoku kuatisa omanu oco va lilongise ocili catiamẽla ku Suku.