Esapulo 94

Yesu wa Solele Omãla

TALA Yesu ndomo a kasi loku kuatelela okamõla. Ndomo o cilete, eye o sole calua omãla. Alume vo vandekela ndeti, olondonge viaye. Nye Yesu a kasi loku va sapuila? Tu ci konomuisi.

Yesu lolondonge viaye va mala oku linga ungende umue walua. Eci va kala vonjila olondonge via kala oku lihoyisa. Noke, Yesu wa va pulisa hati: ‘Nye wa lihoyisili vonjila?’ Yesu wa kũlĩhĩle esunga lieci ovo valihoyisila. Eye wa va pulisa ño oco a kũlĩhe ovisimĩlo viavo.

Olondonge ka vio tambuluile, momo via kala loku lihoyisa nda helie wa velelepo pokati kavo. Olondonge vimue via yonguile oku velapo pokati ka vakuavo. Ndamupi Yesu a vangula lavo oco a va lekise okuti ka ca sungulukile oku livelisapo?

Yesu wa kuata okamõla, wa ka tumbika pokati kolondoge. Noke wa va sapuila hati: ‘Mopia lene okuti, lalimue eteke vu iñili vusoma wa Suku nda ka wa pongolokeli ndomãla. Omunu wa velapo vusoma te una o lisokisa ndokamõla aka.’ Wa kũlĩha eci Yesu a popela olondaka evi?

Ocili okuti omãla ka va likapi kovonene pokati kavakuavo. Omo liaco olondonge via sukilile oku upa ongangu yomãla yoku liketisa kuenda oku yuvula oku likapa kovonene.

Onjanja yikuavo, Yesu wa va lekisa ndomo eye a solaile calua omãla vatito. Eci papita olosãi vimue, omanu vamue va nena omãla vavo oco va mole Yesu. Olondonge via seteka oku tutuiya omãla. Pole Yesu wa popia lavo hati: ‘Omãla veye ño kokuange, ko ka va tutuiyi, momo usoma wa Suku womanu va soka ndava.’ Noke Yesu wa kuata kovoko omãla kuenda wa va sumũlũisa. Ka ci tu sanjuisa hẽ oku kũlĩha okuti Yesu o sole omãla?

Mateo 18:​1-4; 19:​13-15; Marko 9:​33-37; 10:​13-16.