Esapulo 100

Yesu Vocumbo

NOKE eci Yesu lolondonge viaye va tunda vohondo va lila o Paskoa, va enda kocumbo ca Gesemane. Ovo va endaileko ale olonjanja vialua. Yesu wa va sapuila oco va lavulule loku linga olohutililo. Noke eye wa enda okacinãla kamue, wa tuvika ocipala posi kuenje wa likutilila.

Noke Yesu wa tiuka apa olondonge via kala. Nye o sima okuti oco ovo va kala loku linga? Va kala loku pekela! Yesu wa va sapuila olonjanja vitatu oco va lavulule. Pole, olonjanja viosi Yesu wa va sanga okuti va pekela. Yesu wa popia lavo hati: ‘Ka wa tẽleli oku lavulula ndaño owola yimosi? Noke onjanja ya sulako wa va sapuila hati, ñasi okuiya. Momo ‘otembo yange yoku pakuiwa ya pitĩlapo.’

Vonjanja yaco va yeva onjuela yo wiñi wakahandangala. Tala alume ava va kasi lokuiya ndeti lo losipata kuenda olombueti! Ovo va kasi loku nena ovimihi lolondiyelo. Eci va pitĩla ocipepi, ulume umue wamẽla ku Yesu. Kuenje wo sipula, ndomo ocilete vociluvialuvia. Ulume waco Yuda Isikariote. Momo lie eye a sipuila Yesu?

Yesu wa pula hati: ‘A Yuda, o makula lesipulo?’ Esipulo lia kala ondimbukiso. Lia ecelela alume va kala oku enda la Yuda oku limbuka Yesu, momo eye va yonguile. Ovanyali va kuata Yesu. Puãi Petulu, ka yonguile okuti Yesu vo wambata. Eye wopa osipata kuenje wa sonja etũi liulume umue wa kala ponele yaye. Kuenje eci Yesu a ci mola wo sakula.

Yesu wa popia la Petulu hati: ‘Someha osipata yove vocilalo cayo. Osima okuti si tẽla oku pinga ku Tate hã ha numisa ndopo olohoka viovangelo oco vi ndi popele?’ Eye nda wa ci linga! Pole, ka pingile ku Suku oco a tumise ovangelo, momo eye wa kũlĩhĩle okuti ya pitĩlilepo otembo yoku u pakula. Eye wa ecelela oku wambata. Tu konomuisi eci ceya oku lipita la Yesu.

Mateo 26:​36-56; Luka 22:​39-53; Yoano 18:​1-12.