Esapulo 101

Yesu wa Pondiwa

TALA ocina cĩvi ci kasi loku lingiwa! Yesu o kasi loku pondiwa. Va kasi loku u valela kuti. Vo valela lolopeleko povaka loko lomahi. Momo lie omanu va lingila ndoco Yesu?

Momo omanu vamue va suvukile Yesu. Wa kũlĩha hẽ omanu vaco? Umue pokati kavo, ungelo ũvi, Satana Eliapu. Eye wa linga okuti Adama la Heva va sinila Yehova. Kuenda Satana eye wa vetiya ovanyali va Yesu oku linga ungangala owu.

Ndaño muẽle ceci handi Yesu ka valeliwile kuti, ovanyali vaye vo lingaile ale ovina vĩvi. Ivaluka ndomo Yesu ambatiwa eci vo sanga vocumbo co Gesemane? Velie va kala ovanyali vaco? Ocili okuti, ovanyali vaco va kala asongui vetavo. Tu konomuisi eci ceya oku pita noke.

Eci Yesu ambatiwa lasongui vetavo, olondonge viaye via tila. Ovo va siapo Yesu lika liaye, kumue lovanyali vaye momo va kala lusumba. Pole upostolo Petulu la Yoano ka va tililile ocipãla. Va kala loku u kuama ocituanyima oco va tale eci cika pita la Yesu.

Ovitunda viambata Yesu ku Anasi u wa kala ocitunda cinene. Owiñi ka wa kailepo osimbu yalua. Noke Yesu vo wambata konjo ya Kayafa, ocitunda cinene. Asongui valua vetavo va liongoluila konjo yaye.

Yesu wa sombisiwa konjo ya Kayafa. Va nena omanu oco va popie ovina viuhembi viatiamẽla ku Yesu. Asongui vetavo va popia hati: ‘Yesu te wa pondiwa.’ Vo siyila kocipala, noke vo veta.

Osimbu ovina evi via kala oku pita, Petulu wa kala posamua yocitali. Omanu va siakala ondalu, omo kua kala oku linga ombambi yalua. Eci va kala loku yota, ufeko umue upika wamola Petulu kuenje wa popia hati: ‘Ulume u wa kalavo la Yesu.’

Petulu wa kumbulula hati: ‘Sio, hameko!’

Petulu wa likala olonjanja vitatu okuti eye ka kaile la Yesu. Olonjanja viosi eci vo pula eye wa likala muẽle okuti haciliko. Vonjanja yatatu, Yesu wa vandekela Petulu. Pole, Petulu wa sumuile calua omo a vangula uhembi. Noke wa lila calua, kuenje wa enda.

Votãlo, eci kuaca omẽle, ovitunda vinene viambata Yesu kekanga. Kuenje va kala loku likunda eci va kolinga. Noke vo wambata ku nguluvulu Pilato, soma yofeka ya Yudea.

Ovitunda via popia la Pilato hati: ‘Ulume u ũvi. Eye te wa fa.’ Noke lioku linga apulilo ku Yesu, Pilato wa popia hati: ‘So sangele leko.’ Noke Pilato wa tuma Yesu ku Herode Antipasi. Herode wa kala osoma yoko Galilea pole eye wa kala ko Yerusalãi. Herode ka muile lacimue cĩvi ci pisa Yesu. Omo liaco, wo tiuwiya ku Pilato.

Pilato wa yonguile oku yovola Yesu. Pole, ovanyali va Yesu va yonguile oku yovola omandekua yikuavo. Ulume waco Baraba, wa kala kaminyo. Ca kala ale kekumbi eci Pilato a nena Yesu posamua. Eye wa pulisa komanu hati: ‘Tali, soma Yene!’ Ovitunda vinene via kumbulula hati: ‘U wambata! A pondiwe! A pondiwe!’ Noke Pilato wa yovola Baraba. Kuenje Yesu vo wambata oco a pondiwe.

Yesu wa valeliwa kuti votãlo kekumbi. Kuenje ponele yaye pakala alume vavali olondingaĩvi, okuti va valeliwilevo kuti. Ka tu pondola oku va mola palo pociluvialuvia. Eci handi Yesu ka file, umue pokati kolondingaĩvi, wa popia laye hati: ‘Eci iñila vusoma wove, njivaluke.’ Yesu wo kumbulula hati: ‘Hu sapuila etaili okuti, oka kala lame vocumbo ceposo.’

Ohuminyo eyi ka yi sanjuisa? Wa kũlĩha ocumbo ceposo Yesu a kala loku vangula? Pi ca kala ocumbo ceposo eci Suku a fetika oku lulika ovina? Ocili okuti ca kala palo posi. Eci Yesu aka viala ndosoma kilu, eye oka pindula ulume waco oco a kale vocumbo ceposo palo posi. Ohuminyo yaco hẽ ka tu yi sanjukila?

Mateo 26:​57-75; 27:​1-50; Luka 22:​54-71; 23:​1-49; Yoano 18:​12-40; 19:​1-30.