Esapulo 104

Yesu wa Tiukila Kilu

VOKUENDA kuoloneke, Yesu wa li molehĩsa olonjanja vialua kolondonge viaye. Eteke limue olondonge 500 vio mola. Eci Yesu a molẽha kokuavo, wa kũlĩha eci eye a popia lavo? Wa popia lavo catiamẽla Kusoma wa Suku. Yehova wa tumĩle Yesu palo posi oco a longise eci catiamẽla Kusoma. Eci a pinduka wamamako oku ci linga.

Ove hẽ ivaluka eci ci lomboloka Usoma wa Suku? Usoma uviali wa Suku u kasi kilu. Yesu Eye wa nõliwa la Suku oco a kale osoma yuviali waye. Ndomo tua ci lilongisa ale, eci Yesu a kala palo posi wa lekisa okuti eye oka kala osoma yimue yiwa. Eye wa ci linga poku tekula omanu, poku sakula olombei kuenda poku pindula ava va fa!

Omo liaco, eci Yesu aka viala ndosoma vokuenda kuohũlũkãi yanyamo kilu, ongongo yika kala hẽ ndati? Ongongo yika kala ofeka yelau. Kaku ka kala vali uyaki, ungangala, oku vela, ale oku fa. Tua kũlĩha okuti eci cika kala muẽle ocili. Momo Suku wa lulika ongongo oco yikale ofeka yeposo kuenda oco omanu va tungemo lesanju. Eli olio esunga lieci kefetikilo Yehova a lulikilile ocumbo Cedene. Kuenda Yesu oka tẽlisa ocipango ca Suku.

Otembo ya Yesu yoku tiukila kilu ya pitĩlapo. Yesu wa li molehĩsa kolondonge viaye vokuenda kuakũi akuãla koloneke. Kuenje eci ca va ĩha ekolelo liokuti Yesu wa pinduka muẽle. Pole, eci handi Yesu ka tiukilile kilu wa popia lolondonge viaye hati: ‘Ko ka tundi vo Yerusalãi, oco vu tambuli espiritu sandu.’ Espiritu sandu ongusu yapama ya Suku. Olio li kasi ndofela. Espiritu liaco lia kuatisa olondonge oku linga ocipango ca Suku. Oku sulako Yesu wa popia lavo hati: ‘Kundi eci catiamẽla kokuange toke kasulilo okilu lieve.’

Eci Yesu a popia olondaka evi kua pita ocina cimue ci komõhisa. Yesu wa fetika oku londa kilu, ndomo o cilete ndeti. Noke alende ositika, yu olondonge ka vio muile vali. Yesu wa enda kilu, kuenje wa fetika oku viala olondonge viaye via kala palo posi.

1 Va Korindo 15:​3-8; Esituluilo 21:​3, 4; Ovilinga 1:​1-11.