Onepa ya 1
Suku Okuete Muele Ocikembe Letu?
1, 2. Api apulilo alinga omanu citiamela ku Suku, kuenda momo lie?
YIMUE onjanja vomuenyo, walipulile: ‘Nda kuli Suku umue okuete muele ocikembe letu, nye aecelela okuti ku kala ohali?’ Vosi yetu tua tala ale ohali ale tua kũliha yumue wa yi tala.
2 Ocili, ndomo asapulo a sipulula, omanu vasiata oku tala ohali lefengi litunda kovita, kungangala, kũvi, koku puiya, kuhukuĩ, kuvei kuenda ko kufa kuolosoliwe viavo. Handi ño mulo vocita ca 20, ovoyaki vaipaya vipitahãla 100 colohuluwa viomanu. Ovita lovita violohuluwa komanu via valuiwa ale va pesela olonjo viavo lukuasi. Vialua ovina vikoka usumba vi lingaiwa koloneke vietu, loku koka enyumalo, asuelela kuenda ovisimilo vioku konyoha kuomanu ka va tendiwa.
3, 4. Nye valua vasima omo Suku aecelela ohali?
3 Vamue va pekengua kuenda vasima okuti, nda kuli umue Suku, ka tu sole ocili. Ale pamue vasima muele okuti ka kuli Suku. Ndeci, umue ulume wa lambalaliwile, elambalalo eli lieya oku nena olofa viakamba lepata liaye Kuyaki Watete Woluali, wa pula: “Suku wakala pi kepuluvi tuosukila?” Ukuavo, wa puluka ko kufa lolonazista viu Uyaki Wavali Woluali, poku pekengua calua lohali wa popia: “Nda umue wa lesele kutima wange, nda wa lambuka.”
4 Oco, valua ka va sangi elomboloko liokuti Suku umue uwa ecelela ekalo liovina vĩvi. Va tatãla nda eye okuete muele ocikembe letu ale nda eye muele o kasiko. Kuenda valua pokati kavo vasima heti ohali yenda hũ lomanu.
[Elomboluilo kemẽla 2, 3]
Oluali lumue luokaliye lualipua vohali lukasi ocipepi?