Ocipama 1

Suku Oku Laleka Oco Okale Ekamba Liaye

Suku oyongola okuti ove okala ekamba liaye. Olonjanja vimue wasiata oku kuata ocisimĩlo coku kala ekamba lia Una wavelapo vosi voluali? Avirahama una wakala kosiãhũlu, weya okutukuiwa okuti ekamba lia Suku. (Tiago 2:23) Vakuavo valomboluiwa Vembimbiliya lavo vo vakuatele esanju lialua vukamba la Suku kuenda vakuatele esumũlũho lialua. Etali, omanu vatunda kolonepa viosi violuali vakasi okulinga akamba va Suku. Ove opondola vo oku kala ekamba lia Suku.

Oku kuata ukamba la Suku oco cavelapo vali okuti ukamba lomanu cisule. Suku lalimue eteke akasumuĩsa akamba vaye, vana vapokola ocili kokuaye. (Olosamo 18:25) Oku kala ekamba lia Suku cavelapo vali okuti oku kuata ovokuasi cisule. Eci omunu umue ohuasi afa, olombongo viaye visiala la vakuavo. Puãi, vosi vana valivala ukamba la Suku vakuete ukuasi umue okuti lomue opondola oku va u tambula.​—⁠Mateo 6:⁠19.

Omanu vamue vaka kuseteka oco oliwekepo oku lilongisa eci catiamela ku Suku. Ndaño vamue akamba vove kuenda la vakuepata liove oco vayongola. (Mateo 10:​36, 37) Nda vakuene vakuyola epembe ale vaku kokisa ohele, lipula ove muele, ‘Helie ndiyongola okusanjuisa​—⁠omanu ale Suku?’ Sokolola ciwa eci: Nda umue ovangula love oco oliwekepo okulia, opondola oku u pokola? Casunguluka okuti olikala! Ove osukila eteku oco okale lomuenyo. Kuenje Suku opondola oku kuavela omuenyo ka upui! Omo liaco, ku kaecelele okuti ukuene okutateka okulilongisa ndomo ove opondola oku kala ekamba lia Suku.​—⁠Yoano 17:⁠3.