Ocipama 6
Ofeka Yelau Yikasi Ocipepi!
Ovina vĩvi vikasi okupita etali voluali vilekisa okuti Ofeka Yelau yikasi ocipepi. Embimbiliya lialombolola okuti kuka moleha olotembo viohali noke haico vokuiya Kuofeka Yelau. Etu tukasi kolotembo viaco etali! Kulo tukuete ovina vimue Embimbiliya lialombolola okuti te vieya okupita:
Ovoyaki alua. “Ofeka yi katukila ofeka, lusoma u katukila usoma.” (Mateo 24:7) Ocituma Suku eci ceya muẽle okutelisiwa ocili. Tunde kunyamo wo 1914, kualingiwa ovoyaki anene avali o luali luosi kuenda alua ovoyaki akuavo atito. Kuafa olohuluwa viomanu kovoyaki aco o ndoto.
Ovoveyi akahandangala. “Kolonele vimue ku kala onjala lefengi.” (Luka 21:11) Eci he capita muele ocili? Oco. Uveyi wo cancer, uveyi utima, otumbe, o malaria, o SIDA, kuenda ovoveyi akuavo aponda omanu cisoka olohuluwa.
Ekambo liokulia. Tunde nunde oluali lukuete omanu vana kavakuete oku lia ku tẽla okuva tekula. Anyamo alua olohuluwa viomanu vakasi oku fa omo lionjala. Eci ondimbukiso yikuavo okuti Ofeka Yelau yikasi muele ocipepi. Embimbiliya lisapula okuti: “Ku kalavo onjala.”—Marko 13:8.
Ovilemawe. “Ku kakala . . . lovilemawe kuiñi kuiñi.” (Mateo 24:7) Eci lacovo cikasi okutelisiwa muẽle ocili kotembo yetu. Cipitahãla ohulukãi yomanu vafa vovilemawe tunde kunyamo wo 1914.
Omanu olondingãvi. Omanu va linga “vakuakusola olombongo” kuenda “vakuakulisola.” Ovo valinga “vakuakusola ca lua esanju, Suku ci sule.” Omãla valinga ‘vakuakusiñaila olonjali viavo.’ (2 Timoteo 3:1-5) Ku tava hẽ okuti etali kuli muele omanu vakasi ndomo? Ovo kavakuete esumbilo lalimue la Suku kuenda vasandiliya okukapa ovitangi pokati kavosi vana vasole okuseteka oku lilongisa eci catiamela ku Suku.
Ungangala. Ku kakalavo “evĩho li lua.” (Mateo 24:12) Omo liaco ove otava okuti ungangala ukasi okulivokiya vali calua okuti anyamo apita cisule. Omanu kolonepa viosi vayokoka omo liokunyaniwa, loku pitisiwa ekanga, ale vepese.
Ovina evi viosi vilekisa okuti Usoma wa Suku ukasi ocipepi. Embimbiliya lisapula okuti: “Eci vu mola ovina evi okuti vi kasi loku lingiwa, limbuki okuti Usoma wa Suku u kasi ocipepi.” (Luka 21:31) Usoma wa Suku hẽ nye? Eci cilomboloka uviali wa Suku wokilu okuti u kanena Ofeka Yelau palo posi. Usoma wa Suku u kapiñala ovoviali omanu.—Daniele 2:44.