Ocipama 7

Elungulo Limue Litunda Kotembo Yosimbu

Yehova lalimue eteke akacelela omanu vakuevĩho okunyola Ofeka Yelau. Akamba vaye lika vaka kalamo. Anga hẽ nye cikapita lomanu vakuevĩho? Loku kũlĩhisa etambululo liaco, vanja lutate esapulo lia Noha. Noha umue wakala ale cisoka olohulukãi vianyamo konyima. Eye wakala omunu ukuesunga una okuti olonjanja viosi walinga lepandi lialua onjongole ya Yehova. Pole omanu vakuavo posi valinganga ovina vĩvi. Omo liaco Yehova wasapuila Noha okuti Eye okanena etande liovava loku kundula omanu vosi vana vãvi. Eye wasapuilavo Noha oco atunge ocimbaluku oco eye kuenda epata liaye vapopeliwe kolofa eci Etande liovava liya.​—⁠Efetikilo 6:​9-18.

Noha kuenda epata liaye vatunga ocimbaluku. Noha walungula omanu okuti Etande liovava likasi okuiya, kuenje ovo kavatavele kokuaye. Ovo vamamako lokulinga ovina vĩvi. Noke yokumala ocimbaluku, Noha wañisa ovinyama vocimbaluku, eye muẽle kuenda epata liaye kumosi vañila vokati. Noke Yehova wanena ehunguhungu liovava. Ombela yaloka cisoka 40 kovotanya kuenda 40 kovoteke. Ovava etande ayukisa osi yosi.​—⁠Efetikilo 7:​7-12.

Omanu olondingãvi vanyelisa ovimuenyo viavo, pole Noha kuenda epata liaye vayovoka. Yehova poku nena Etande ongongo wa yiyelisa lokumalako ũvi wosi. (Efetikilo 7:​22, 23) Embimbiliya lisapula okuti ndopo muẽle Yehova oka nena vali ekunduko komanu vana okuti ka va yongola okulinga eci casunguluka. Omanu vawa okuti vasunguluka ka vaka kunduiwa. Ovo vaka kuata omuenyo kaukuete esulilo Vofeka Yelau palo posi.​—⁠2 Petulu 2:​5, 6, 9.

Etali omanu valua valinga eci cĩvi. Oluali lueyuka lovitangi. Yehova watumbika vali Olombangi viaye kuenda vakasi vali loku lungula omanu, pole onepa yalua kavatava okuyevelela olondaka via Yehova. Kava tava oku pongolola ovimuenyo viavo. Ovo kavayongola okutava eci Suku apopia catiamela cueci cĩvi leci ciwa. Nye hẽ cikapita lomanu vaco ava? Anga hẽ eteke limue ovo vaka pongoloka? Valua okuti lalimue eteke vakapongoloka. Otembo yikasi ocipepi eci omanu olondingãvi vaka kunduiwa kuenda lalimue eteke vaka kala vali lomuenyo.​—⁠Olosamo 92:⁠7.

Osi ka yikanyoliwa; yika pongoluiwa vofeka yelau. Vosi vana valinga akamba va Suku vaka kuata omuenyo wenda hu Vofeka Yelau palo posi.​—⁠Olosamo 37:29.