Ocipama 12

Nye Cipita Pokufa?

Okufa hacimuamueko lomuenyo. Okufa cikasi ndomunu wapekela kotulo. (Yoano 11:​11-14) Ocivimbi kacipondola okuyeva, okuvanja, okuvangula ale pamue okusokolola cimue. (Ukundi 9:​5, 10) Etavo liesanda lilongisa okuti ava vafa vakuata vali omuenyo oku kala kumosi lapata avo vafa ale osimbu voluali luespiritu. Eci hacoko cilongisa Embimbiliya.

Omanu vosi vana vafa kavapondola oku tukuatisa, ale pamue oku tu nenela ovitangi. Casiata calua omanu okulinga ovipito viesakulo kuenda ovilumba ovo vasima okuti eci cikasanjuisa omanu vana vafa. Eci cisumuisa Suku omo okuti catiamẽla kuhembi pokati kovohembi alua a Satana. Ocituwa caco ka cipondola oku sanjuisavo u wafa, omo okuti kakuete vali omuenyo. Ka tu kuata usumba ale pamue oku fendela omanu vafa. Tu fendela lika Suku.​—⁠Mateo 4:⁠10.

Ava vafa vakakuata vali omuenyo. Yehova okapasula ava vafa oco vakuate omuenyo vofeka yelau palo posi. Otembo yaco eyi handi yeyi yiyako. (Yoano 5:​28, 29; Ovilinga 24:15) Suku oka pasula omanu vana vafa nda cina ove opasula omunu kotulo.​—⁠Marko 5:​22, 23, 41, 42.

Ocisimĩlo cokuti etu katufi eci uhembi umue wa sandekiwa la Satana Eliapu. Satana kuenda olondele viaye vaeca komanu ovisimĩlo viokuti aspiritu omanu vafa vañualañuala vali komuenyo vanena ovovei añi añi kuenda ovitangi vikuavo. Satana olonjanja vialua olueyisa omanu, luhembi wolonjoi kuenda ovinjoinjoi. Yehova opisa vosi vana vaseteka okuvangula lava vafa.​—⁠Esinumuĩlo 18:​10-12.