Esokiyo Lioku Amisako Uloño Woku Kala Ohundi Kuenda Ulongisi

CIKALE okuti umalẽhe ale wamako ale kanyamo, cikale okuti ulume ale ukãi, elongiso eli lika ku kuatisa oku mioñolola vali ciwa oku vangula kuove kuenda oku kala ulongisi umue wa loñoloha ciwa Wondaka ya Suku.

Ovipama kuava va li sonehisa Kosikola Yupange Wakristão, vika eciwa lusongui wosikola. Kamẽla atatu a kuãimo, oka sangako emẽla liove muẽle lialungulo. Atendelo a kasi tete yatosi añi añi, atiamẽla kalongiso a sangiwa kamẽla a kuaĩmo. Kovipama viaco vielilongiso oka sangako elomboluilo limue lieci ca kongeliwa voku linga olonepa viaco evi vioku vangula levi vioku longisa, lesunga lieci onepa lonepa pokati kavio yi kuetele esilivilo. Oka sangakovo olonumbi vi lekisa ndomo ku lingiwa eci ca imbiwa onumbi.

Ondimbukiso yi kuete evala, yi sangiwa kemẽla lielungulo, yi lekisa atosi a sukila oku kapiwako kueci catiamẽla kovipama vina okuti mua kongela (1) oku tangela olonjeveleli, (2) ocindekaise cimue mu kongela omanu vavali ale valua, (3) ohundo yi lingiwila ekongelo. Usongui wosikola oka ku imba onumbi yetosi oka talavaya. Ciwa okuti, o talavaya ño vetosi limosi vonjanja. Ove oka kuatisiwa calua, poku likolisilako oku linga ocipama coseteko ci sangiwa kesulilo liocipama celilongiso va ku ilikila. Nda wa litunda ciwa poku kapako olonumbi viocipama celilongiso va ku ilikilile, ndunguli yove oka ku ilikila etosi likuavo.

Nda ocipama va ku ilikila ci sukila oku lingiwa ndocindekaise, ove oka sukila oku kuama etosi li lekisa ndomo o ci linga. Ulala umue watosi a lekisa ndomo o ci linga u sangiwa kemẽla 82, pole ka ci sukila okuti o kuama lika atosi aco. Ndunguli yove pamue oka ku imba onumbi yokuti o seteka oku kuama etosi limue likuavo oco o loñolohe ketosi liaco, ale eye oka ecelela okuti ove muẽle o nõla.

Oku tanga elivulu eli kuenda oku linga eci ca imbiwa onumbi, okuti o ci linga muẽle ndaño ku kasi loku lipongiyila oku linga onepa kosikola, cika amisako calua oku amako kuove. Ci tava okuti pamue oka mãla elilongiso limosi vosemana.

Ndaño okuti wa siata ale oku panga onepa kosikola ale kupange woku kunda vokuenda kuotembo yalua, kuli handi olonepa vimue o sukila oku mioñoloha. Tu kevelela okuti upa esilivilo lia velapo kelongiso lieciwila Vosikola Yupange Wakristão.