Oku Epongoluiso Liondaka

OKU vokiyako kuove ondaka ku kuatisa olonjeveleli oku kuata elomboloko lieci o vangula. Pole, eci o pongololapo kamue ocileñi, loku yayulako ale oku livalapo kamue kondaka, leci o kolisako kocileñi, ohundo yove yi kala vali yiwa oku yi yevelela. Handi vali, eci ci pondola oku lekisa kolonjeveleli viove eci o yevite catiamẽla kueci o kasi loku vangula. Ekalo liove li pondola oku vetiya eci ovo va yevite catiamẽla kohundo yaco. Eci ci kuete esilivilo kuosi o vanguila cikale kembumbua ale poku vangula lomanu kupange woku kunda.

Ondaka yomanu, yi kuete ocileñi cimue ca fina calua okuti ci tava oku ci pongoyolola olonjanja vialua. Eci ocileñi caco ci kapiwako lutate ci pondola oku eca ongusu kohundo, ci veta kutima, ci vetiya onjongole kuenda ci vetiyilavo omanu kovilinga. Pole, eci ka ci tẽliwa lika loku kapa ondimbukiso apa o sukila oku tanga vali longusu, oku yayulako vali, ale oku pongolola ocileñi. Oku pongolola ondaka apa wa kapa olondimbukiso viaco, ka cika eca ocileñi ca sunguluka. Eci ka ceci ongusu ndaño owuya kohundo yove, pole ci lingisa olonjeveleli viove oku liyeva lãvi. Oku pongoluisa ciwa ondaka ocina cimue ci tundilila kutima.

Eci epongoluiso liondaka li kapiwako luloño, ka cika velisapo hundi o kasi loku linga ohundo yaco. Pole, cika kuatisa olonjeveleli oku kuata elomboloko lieci ci kasi loku vanguiwa.

Tumbika Ciwa Ocileñi. Yimue onjila yoku pongoluisa ondaka yove, oku tumbika ciwa ocileñi condaka yove. Pole, eci hakuvokiyako lika ocileñi condaka ale oku yi tepulula. Momo oku ci linga, ci pondola oku nyõla elomboloko lieci o kasi loku vangula. Nda o vokayako olonjanja vialua ocileñi longusu yalua, cika kala cimue okuti ka ci sanjuisa.

Ocileñi cove, te ci likuata ciwa leci ci kasi loku lomboluiwa vocipama. Ndaño ceci o tanga ocihandeleko conjanga ndeci ci sangiwa kelivulu Liesituluilo 14:6, 7 ale kelivulu Liesituluilo 18:4, ale olondaka vimue viongusu ndevi via sonehiwa kelivulu Lietundilo 14:13, 14, oku vokiyako ocileñi lonjila ya sunguluka ci sukiliwa. Cimuamue haico, nda okuti o kasi loku tanga ondaka yimue yepiso Vembimbiliya, ndeci eyi yi sangiwa kelivulu lia Yeremiya 25:27-38, oku pongolola ocileñi cove, cika lingisa okuti olondaka vimue vi velisiwapo vali okuti vikuavo ci sule.

Kũlĩhĩsavo ocimãho cove. O yongola oku vetiya olonjeveleli viove oco vi linge eci ci kasi loku vanguiwa? O yongola oku lombolola atosi a velapo vohundo yove? Oku vangula longusu okuti o kapako ocileñi luloño, ci kuatisa oku tẽlisa ovimãho evi. Pole, oku vokiya kuaño ocileñi pamue ku nyõla ocimãho cove. Ndamupi hẽ oco? Eci o kasi loku vangula pamue ci kisika oku lekisa owuya kuenda ocikembe okuti hakuvokiyako ocileñi. Tuka vangula vali catiamẽlako Kelilongiso 11.

Eci ci kapiwako luloño, oku tepulula ocileñi ku pondola oku vetiya onjongole yomunu yoku yevelela eci ca lunga loku vanguiwa. Pole, noke yaco, te haico kua vokiyiwa ongusu kocileñi. Oku vombisako ocileñi kumosi loku ci tõlisa, ku lingiwa poku lekisa ohele ale usumba. Oku tepulula ocileñi ku kapiwakovo poku lekisa okuti eci ci kasi loku vanguiwa ci kuete esilivilo litito oku ci sokisa lolonepa vikuavo vi kasi vesapulo liaco. Pole, nda ocileñi condaka yove olonjanja viosi ca hongua, eci ci pondola oku lekisa okuti o kuete atatahãi ale eci o kasi loku vangula kua ci kolelele ale ku kuetele onjongole yocili ondaka o kasi loku lombolola. Ocili okuti, oku tepulula ocileñi condaka ci sukila oku ci linga lundunguluke.

Pongolola Olupesi Luocileñi Cove. Koku vangula kuetu kueteke leteke, olondaka viya ovio muẽle osimbu tu lekisa eci ci kasi vovisimĩlo vietu. Nda tu yevite esanju, tu vangula lonjanga yalua. Pole, nda tu yongola okuti vakuetu vaka ivaluka eci tu kasi loku vangula, tua siata oku vangula vali levando.

Pole, halohundi viosiko okuti ndopo via fetika vi tẽla oku pongolola ocileñi cavio. Momo lie? Momo ovo, va luluvalela enene kondaka londaka yeci va pongiya vocipama cavo. Pamue, cosi vaka popia va ci soneha. Ndaño muẽle okuti ohundo yaco ka yi sonehiwa yosi, pamue va patekela olondaka viosi vaka popia. Kuenje, eci ciyililako ceci okuti, ohundo yaco yi lingiwa ño locileñi cimosi. Oku lilongisa okupisa olondaka vohundo yina yitukuiwa hati esboço, ci kuatisa oku mioñolola ehonguo eli.

Yuvula oku vokiya ocileñi cove vonjanja yimosi, lonjila yimue okuti yi ivaluisa ongato yi kasi loku ñuala ñuala okuti vocipakulo ciso, haico yi tila lolupesi poku mõla ombua. Kuenda, lalimue eteke ku ka vangule ño enene lonjanga yalua okuti eci o vangula ka ci yevala ciwa.

Oku pongolola ciwa olupesi luocileñi cove, ka ku tẽliwa lika loku yayulako ale loku livala kondaka olonjanja vimue. Ocituwa eci cika nyõla ohundo o kasi loku linga kuenda ka ceci evetiyo. Oku pongolola ciwa olupesi luocileñi cove te kua tiamisiwila kueci o kasi loku popia, koku lekisa eci ci kasi vutima wove, cikale esanju ale esumuo, kuenda kocimãho cove. Linga ohundo yove locileñi ca sokamo. Poku lekisa cimue ci sanjuisa, vangula lonjanga ndeci o lingainga ale vomuenyo wove weteke leteke. Eci ca sungulukavo oku ci linga, poku lombolola atosi amue ka a kuete esilivilo lialua ale ceci o lombolola ulandu umue okuti ka ci sukila oku u tondongola wosi. Eci cika vokiya epuluvi lioku pongoyolola ondaka voku lingiwa kuohundo yove kuenda cika eca ongusu kokuayo. Pole, ndomo ca siata alomboluilo ana a kuete esilivilo lia velapo, atosi a velapo kuenda olondaka vioku sulako, a kuete oku tangiwa vali levando.

Pongoyolola Elaka Liove. Sokolola omunu umue o sika ocisanji votembo yi soka owola. Otembo yaco yosi eye o sika lika ondaka yimosi, tete o sika longusu, noke o vombisako kamue, olonjanja vimue o yayulako pamue o sika levando. Koku sika kuaye, kuli epongoloko liolupesi luovileñi, pole omo okuti ka kuli epongoloko lielaka, “ocisikilo” caco ka ci vetiya utima. Cimosi haico, nda okuti ka tu pongolola elaka lietu, ondaka yetu ka yi kala yiwa oku yi yevelela.

Ciwa oku limbuka okuti epongoloko lielaka ka li kuete evetiyo limuamue kalimi osi. Alimi a vanguiwa locileñi cimosi condaka, ndeci o chinês, oku pongolola elaka ci pongololavo elomboloko lieci ci vanguiwa. Pole, ndaño muẽle kalimi aco, kuli ovina vimue omunu a kuete oku linga oco a lekise epongoloko limue lia sokamo kelaka liaye. Eye o kuete oku likolisilako oku mioñolola epongoloko lielaka liaye osimbu a kuama ocileñi cimuamue condaka. Ndoco, eye o pondola oku vokiyako ale oku vombisako ondaka apa pa sungulukila oku ci linga.

Ndaño muẽle valimi ana okuti ka a kuete ocileñi cimosi lika, oku pongolola elaka ku pondola oku pitiya ovisimĩlo viñi viñi via litepa. Ndeci, oku pongolola naito elaka kumosi loku vokiyako ocileñi, pamue ci lingiwa poku eca ongusu kondaka yimue. Ale oku pongolola elaka pamue ku lingiwa poku lekisa unene wocina cimue ale ocinãla. Oku vokiya ocileñi kesulilo liulala umue wolondaka, ci lekisa okuti ku kasi loku lingiwa epulilo. Kalimi amue ci sukila oku vombisako ondaka.

Esanju kuenda onjolela vi lekisiwa loku vokiyako ocileñi condaka. (Velimi li kuete ocileñi cimosi lika, eci pamue ci sukila oku pongolola ondaka olonjanja vialua.) Oku lekisa esumuo kuenda esakalalo ci sukila oku vombisako ondaka. (Ale valimi a kuete ocileñi cimosi lika, ci sukila ocileñi ci vanguiwa levando lialua.) Ovileñi via tukuiwa palo, koku lekisa esanju ale esumuo, ovio vi kuatisa hundi oku vetiya ovitima viava a kasi loku vangula lavo. Nda o yongola oku vi lekisa, ku ka vangule ño olondaka. Ondaka yove yi lekise okuti vutima wove o yevitevo eci o kasi loku vangula.

Litumbikila Ociseveto. Pi hẽ pa fetikila epongoluiso liondaka? Li fetikila poku nõla ovipama viatiamẽla kohundo yove. Nda lacimue vali o kongelamo, pole oku lombolola lika ale oku lungula lika, oka kuata apuluvi atito voku pongolola ocileñi voku lingiwa kuohundo yove. Omo liaco, konomuisa ciwa ohundo yove kuenda kũlĩhĩsa ciwa okuti o kuete cosi ci sukiliwa coku lingisa okuti ohundo yove yi kala yimue yi vetiya haiyo yeca alomboluilo añi añi.

Sokolola okuti vokati kohundo yove, o yeva esukila lioku pongolola ondaka momo ohundo o kasi loku linga, yi kasi loku livala. Nye hẽ o linga? Pongolola onjila yoku linga ohundo yove. Ndamupi o ci linga? Yimue onjila yoku ci linga oku tuvula Embimbiliya kuenda oku laleka olonjeveleli viosi oco vi tuvulevo Ambimbiliya avo, noke tanga ocisonehua cimue oco ku ka kale ño loku vangula volondaka viove. Ale oku pongoluila olondaka vimue vapulilo, loku tula tula koku eca evetiyo. Ta olusapo lumue lua leluka. Eci oco olohundi via loñoloha via siata oku linga. Pole, cikale okuti olusapo luove luonimbu ale lua lepa, lopo o sesamẽla oku kapako ovisimĩlo vimuamue eci o pongiya ohundo yove.

Ci tava oku popia hati epongoluiso liondaka olio uwa wohundo. Nda ku kapiwa ocileñi ca sunguluka vetendelo lia sokapo, eci cika eca uwa wocili kohundo yove kuenda cika sanjuisa olonjeveleli viove.