Evetiyo Lioku Tanga Embimbiliya

ONJONGOLE yetu, oku suñamisila ovisimĩlo viomanu vosi Kembimbiliya, omo olio Ondaka ya Suku. Elivulu eli li kola ndeti, olio ono yondaka tu kasi loku kunda. Omo liaco, tu yongola okuti omanu va limbuka okuti eci tu kasi loku popia, ka tu kasi loku ci popia locipango cetu muẽle, pole ci tunda ku Suku. Omanu va sukila oku kolela Kembimbiliya.

Kupange Woku Kunda. Poku liangiliyila oku enda kupange woku kunda, olonjanja viosi, nõla ocinimbu cimue ale vivali Viembimbiliya oka tangela omanu va lekisa onjongole yoku ku yevelela. Ndaño okuti wa sokiya lika oku ka popia olondaka vimue vionimbu vioku eca elivulu limue li lombolola eci ci kasi Vembimbiliya, ci kuete esilivilo lialua oku tanga ocisonehua cimue Cembimbiliya catiamẽla kondaka yi kasi loku vanguiwa. Embimbiliya li kuete unene walua woku lekisa onjila yiwa komanu va soka ndolomeme, okuti ovina viosi etu muẽle tu popia ci sule. Apa okuti ka pa tava muẽle oku tangelapo Embimbiliya, ci tava okuti o nõlapo ño oku li tukula. Kocita catete, oviña Viovisonehua ka via molãhale enene. Pole, Yesu lolondonge viaye va enda loku tukula Ovisonehua olonjanja vialua. Etu tu sukila oku likolisilakovo oku patekela ovisonehua oco tu talavaye lavio kupange wetu woku kunda, ndaño muẽle oku vi tukula ño.

Nda ci tava oku tanga Embimbiliya, li tanga lonjila yimue okuti omunu ove o kasi loku vangula laye, o pondola oku ku kuama osimbu o tanga. Nda okuti eye o kuama Lembimbiliya liaye muẽle osimbu ove o tanga, etambululo liaye kueci ca tangiwa, lika kala vali liwa.

Pole, o sukila oku limbuka okuti apongoluisi vamue Vembimbiliya va pongoluila Ondaka ya Suku kovipango viavo muẽle. Ovisonehua viavo pamue ka vi litava kolonepa viosi leci ca kala kalimi atete Embimbiliya lia sonehiwile. Omo liaco, vonepa yimue Yambimbiliya, ka mu sangiwa onduko ya Suku. Ovo va pongolola eci ovisonehua viatete vi popia catiamẽla kekalo liava va fa, kuenda va nyõlamo eci Embimbiliya li popia catiamẽla kocipango ca Suku lilu lieve. Oco o lekise komunu o kasi loku vangula laye eci ca lingiwa, ove ci tava okuti o sokisa ovinimbu vimue Viembimbiliya leci ca sonehiwa Vambimbiliya akuavo, ca piãla enene ana a sonehiwa kosimbu. Catiamẽla kovina vimue, elivulu Raciocínios a Base das Escrituras li sokisa ndomo Ambimbiliya alua a pongolola olondaka viovinimbu vimue Viembimbiliya via siata oku tukuiwa olonjanja vialua. U wosi o sole ocili, oka pandula omo lioku kũlĩha ocili eci.

Kolohongele Viekongelo. Vosi va kuete oku vetiyiwa oco va tange Ambimbiliya avo kolohongele viekongelo. Eci ci kuatisa kovina vialua. Ci kuatisa oku tiamisila ovisimĩlo violonjeveleli kueci ci kasi loku vanguiwa. Ci vokiya ongusu kelongiso li kasi loku eciwa la hundi, poku li talela ovo muẽle ovinimbu via tukuiwa. Kuenda ci vetiyavo ovisimĩlo viava va fetika ndopo vioku limbuka okuti, Embimbiliya, olio muẽle ocili ono yeci tu tava.

Nda olonjeveleli viove vika ku kuama Lambimbiliya avo osimbu o tanga ovinimbu vimue Viembimbiliya, cosi catiamẽla calua kevetiyo ove eca kokuavo lioku ci linga. Oku va pañinya oyo onjila ya velapo yoku ci linga.

Ocikele ca hundi, oku nõla ovisonehua aka velisapo vali oku tukula, okuti ovio aka pinga kolonjeveleli oku vi konomuisila kumosi laye. Ciwa oku tanga ovisonehua vina vika ku kuatisa oku lombolola atosi a velapo a sangiwa vohundo yove. Noke, nda otembo yu kuecelela, vokiyako ovisonehua vimue vikuavo vi lekisa uvangi weci o kasi loku lombolola.

Ocili okuti, oku tukula ño ovisonehua ale oku laleka olonjeveleli oku vi tanga, ka ci tẽla. Nda wa tanga ocisonehua cimue noke haico o tẽhela kocisonehua cikuavo osimbu handi olonjeveleli ka via sangele ocisonehua catete, ovo ka vaka vetiyiwa, kuenje vaka liwekapo oku seteka oku ku kuama koku tanga Embimbiliya. Kũlĩhĩsa. Pana okuti onepa yalua yolonjeveleli ya sanga ale ocisonehua, oco o tanga noke.

Sokolola kovaso. Livanga oku tukula tete ocisonehua oka tanga osimbu handi kua ci tangele. Eci cika tepulula otembo yoku kevelela toke olonjeveleli vi sanga ocisonehua caco. Ndaño okuti ocipama cika lomboluiwa citito, nda wa eca otembo kolonjeveleli viove oco vi sange ovisonehua, ku kopiwa vali esilivilo lia velapo.